Senatorlar búgin TMD elderinde sottalǵan azamattar memlekette jazasyn óteı alatyn zań qabyldady. Biraq onda bir másele bar. Olardy jazalaý bas bostandyǵynan aıyrýǵa baılanysty bolmaýy tıis, dep habarlaıdy Egemen.kz Senattyń baspasóz qyzmetine silteme jasap.
«Konvensııany ratıfıkasııalaý bas bostandyǵynan aıyrýmen baılanysty emes qylmystyq jazaǵa tartylǵan azamattardy óz elinde jazasyn óteý múmkindigi men áleýmettik ońaltýǵa, sondaı-aq jańa qylmystardyń aldyn alýǵa jáne qylmysqa qarsy kúrestiń tıimdiligin arttyrýǵa yqpal etetin bolady», dedi senator Rysqalı Ábdikerov.
Bul ereje «Táýelsiz Memleketter Dostastyǵyna qatysýshy memleketterdiń bas bostandyǵynan aıyrýmen baılanysty emes jazalardy oryndaýdy berý týraly konvensııasyn ratıfıkasııalaý týraly» zańda jazylǵan.
QR IIM aqparaty boıynsha, qazirgi ýaqytta Qazaqstannyń 280 azamaty mundaı jazany TMD elderinde, onyń ishinde 251 adam – Reseıde, 24-i О́zbekstanda, 3-ýi Belarýste jáne 2-eýi Qyrǵyzstanda ótep jatyr.
Qabyldanǵan zańǵa sáıkes, bizdiń elimiz óz kezeginde, Qazaqstanda sottalǵan TMD elderiniń azamattaryna, sondaı-aq jazanyń qalǵan bóligin óz Otanynda óteýge múmkindik berýi tıis. Qazir TMD elderiniń 447 azamaty probasııa boıynsha bizdiń elimizde júr.
Eger sot sheshimimen medısınalyq sıpattaǵy májbúrleý sharalary taǵaıyndalsa, jaza retinde aıyppul nemese múliktik sıpattaǵy ózge de jaza, sondaı-aq tárkileý belgilengen bolsa Konvensııanyń erejeleri qoldanylmaıdy.