Depýtat Sultan Dúısembınov Úkimet basshysynynyń orynbasarlary Eraly Toǵjanov pen Roman Sklıarǵa joldaǵan saýalynda qazaqstandyq baý-baqshaǵa, ulttyq maqtanyshymyz bolyp tabylatyn «almatylyq aportqa» erekshe qaýip tóndirip otyrǵan bakterııalyq kúıik qateri týraly dabyl qaqty, dep habarlaıdy Egemen.kz Senattyń baspasóz qyzmetine silteme jasap.
Respýblıka aýmaǵynda bakterııalyq kúıik alǵash ret 2000 jyldardyń basynda tirkeldi jáne onyń taralý aımaǵy jyldan jylǵa keńeıýde. Sońǵy jyldary osy aýrýdy juqtyrǵan baqtardyń aýmaǵy 50 ese ósti.
«Qazaqstan Respýblıkasynyń «О́simdikter karantıni týraly» Zańyna sáıkes, bakterııalyq kúıik ınfeksııasynyń oshaqtaryn anyqtaǵan kezde 30 shaqyrym radıýstaǵy aǵashtar men barlyq ósimdikterdi tamyrdan tazartý, órteý boıynsha karantındik sharalardy júrgizýge májbúr bolady, ol óz retinde mıllıardtaǵan shyǵyndarmen qatar ekologııalyq zardaptarǵa ákeledi. Máselen, 2017-2020 jyldary Almaty oblysy aýmaǵynda bakterııaldy kúıigimen zalaldanǵan baqtar kólemi jyl saıyn 1 myń gektarǵa deıin alqapty qurap otyr, oblys boıynsha 200 gektarǵa deıin baqty zalaldanǵan aǵashtardy túbirimen qoparý jumystary júrgizilgen», dedi Sultan Dúısembınov.
Depýtat mamandardyń paıymdaýynsha, bakterııalyq kúıikke qatysty tıisti sharalardy júrgizbeý, elimizdiń barlyq jemis ekpeleriniń 50 paıyzdan astamy men alma baqtarynyń tolyqtaı joǵalýyna soqtyrýy múmkindigin atap ótti. Sondyqtan senator Bilim jáne ǵylym mınıstrligine - jemis daqyldarynyń bakterııalyq kúıigine qarsy ǵylymı zertteýlerdi jáne otandyq bıopreparattardy keń aýqymdy synaý boıynsha baǵdarlamalyq-maqsatty qarjylandyrý, QR Aýyl sharýashylyǵy mınıstrligine - bıopreparattardy serııalyq óndirý boıynsha tıisti jumystardy uıymdastyrýdy tapsyrý oryndy dep sanaıdy.