Mundaı kórme buryn-sońdy Shyǵysta bolmaǵan. Búgin 1 sáýir – kúlki kúnine oraı О́skemendegi A. Pýshkın atyndaǵy kitaphanada «Ezý tartar» atty sharj, karıkatýra kórmesi ótti.
Karıkatýra – jaýynger janr. Bul janr qoǵamdaǵy túıitkildi máselelerdi, halyq pikirin sýret arqyly bılikke jetkizýdiń bir joly. Bılik deımiz, ókinishtisi kórmede ákimdiktegi basshylardyń biri de bas kórsetpedi. Kelse, ózderine qatysty birqatar máselelerdi túrtip alýlaryna bolar edi. Jemqorlyq, paraqorlyq, ákim-qaralardyń jumystaryna degen salǵyrttyǵy karıkatýralarda aıqyn beınelenipti. Kórermendi bir kúldirip, bir jylatatyndaı-aq sýretter. Sonymen qatar, dostyq sharjdar da toptastyryldy.
Shara basynda sharj sheberi Erkin Nurazhan ekran arqyly jerles sýretshilerine júrekjardy lebizin bildirdi.
– Búgingi aqparat zamanynda karıkatýra óneri qoǵamǵa aýadaı qajet. Karıkatýra, satıra, sharj janryndaǵy sýretter tildi qajet etpeıdi. Kenje qalǵan ónerdi qolǵa alyp, kórme ótkizip jatqan jerlesterime sáttilik tileımin, – dedi Erkin Nurazhan.
Iá, qylqalamdary júırik, oılary ushqyr sýretshilerdiń jumystary kórmede kózge birden tústi. Shyǵystaǵy kásibı, áýesqoı sýretshilerdiń basyn qosyp, «Jańǵyrý» birlestigin qurǵan Qudash Nursadyqov karıkatýranyń qıyn janr ekenin sóz etti.
– Sýret salý bir basqa da, sóılep turǵan karıkatýra salý múldem basqa eken. Alǵashynda júreksingenimizben, biraz máseleni kóteretindeı karıkatýra salyp jiberdik. Bul alǵash ret ótip otyrǵandyqtan kem-ketikter bar shyǵar. Onyń bári aldaǵy ýaqytta túzeledi. Buıyrsa, karıkatýra kórmesin jylda 1 sáýirde dástúrli túrde ótkizemiz, – dedi Sýretshiler Odaǵynyń múshesi Qudash Nursadyqov.
Shara sońynda qylqalam sheberleri kelgen kórermenderge arnap sheberlik sabaqtaryn ótkizdi.