Nur-Sultan qalasynyń ákimi Altaı Kólginov Instagram paraqshasynda elordanyń shetki aımaqtarynyń abattandyrylýy jaıly málim etti, dep habarlaıdy Egemen.kz.
«Búgin qalanyń shetkeri aımaqtaryna bardym. Qalada barlyǵy 280 myń adam turatyn 16 eldi meken bar. Bul - elorda halqynyń tórtten biri. Árbir eldi meken boıynsha qadamdyq is-sharalar jospary ázirlendi.
Mysaly, byltyr eldi mekenderde 100-den astam kóshe asfalttaldy, 40-tan astam qoǵamdyq keńistik (saıabaqtar, skverler, býlvarlar) jáne aýlalar abattandyryldy. Birqatar áleýmettik nysandar, sonyń ishinde mektepter men "úı mańyndaǵy dáriger" nysandary jáne t. b. salyndy.
13,5 km ınjenerlik jeliler, 5 km-den astam káriz jáne sý qubyry, 3 km-den astam nóser kárizi salyndy. Bul jumystardyń barlyǵyn júıeli túrde júrgizemiz. Eldi mekenderdi aralaý barysynda turǵyndarmen osy jylǵa arnalǵan josparlar talqylandy. Árbir eldi mekenge baryp, is-sharalar josparyna turǵyndardyń qajettiligin engizemiz.
Búgin sondaı-aq dene shynyqtyrý-saýyqtyrý keshenderi qurylysynyń barysymen tanystym. Egde jastaǵy adamdarǵa arnalǵan klýbtar, HQKO, polısııa pýnktteri, poshta bólimsheleri ornalasatyn sport mekemeleri tórt eldi mekende paıda bolady. Turǵyndar sport keshenderine tegin bara alady.
Sonymen qatar, Memleket basshysynyń tapsyrmasyna sáıkes bıylǵy jylytý maýsymynda birqatar eldi meken gazǵa qosyldy. Kóktal-1 eldi mekeninde júrgizilip jatqan gaz taratý jelileriniń qurylysy barysymen tanystym. Búginde jumystardyń 90%-dan astamy oryndaldy.
Buǵan deıin Jeleznodorojnyı, Kóktal-2, Agroqalashyqtyń (bir bóligi) eldi mekenderiniń turǵyndary gazǵa qosyldy. Sondaı-aq, 1-JEO jáne 2-JEO birqatar sý jylytý qazandyqtary gazǵa aýystyryldy.
2021 jyldyń sońyna deıin Ońtústik-Shyǵys (oń jáne sol jaǵy), Promyshlennyı, Kóktal-1, Agroqalashyq eldi mekenderi gazben qamtamasyz etiledi. Sondaı-aq, "QazTransGaz Aımaq " AQ
Kúıgenjar, Internasıonalnyı, Mıchýrıno eldi mekenderinde osy jyldyń sońyna deıin gaz ótkizýdi josparlap otyr.
Gazdandyrý prosesi úsh kezeńnen turady. Gazdandyrý qalanyń ekologııasyn jaqsartyp qana qoımaı, jeke sektor turǵyndarynyń ómir súrý jaǵdaıyn jeńildetýge múmkindik beredi», — dep jazdy elorda ákimi.