Laýazymdy tulǵalar sybaılas jemqorlyqqa qarsy sharalar qabyldamaǵany úshin 300 myń teńge aıyppulmen jazalanady, dep habarlaıdy Egemen.kz Antıkordyń baspasóz qyzmetine silteme jasap.
Sybaılas jemqorlyqqa qarsy is-qımyl agenttigi tóraǵasynyń birinshi orynbasary O.Bektenov OKQ ótken brıfıngte jemqorlarǵa yqpal etetin qylmystyq-quqyqtyq sharalar – sybaılas jemqorlyqqa qarsy sharalar arsenalyndaǵy jalǵyz qarý bola almaıtynyn jáne bolmaýy tıis ekenin alǵa tartady.
«Sybaılas jemqorlyqtyń aldyn alý turǵysynan mańyzdy sanalatyn, memlekettik organ basshylarynyń jáne ózge de laýazymdy tulǵalardyń sybaılas jemqorlyqqa qarsy is-qımyl boıynsha sharalar qabyldamaǵany úshin jaýapkershiligin kózdeıtin Kodekstiń 680-baby – atalǵan laýazymdy tulǵalarǵa 100 AEK kóleminde, bul shamamen 300 myń teńge aıyppul salýǵa ákep soǵady», dedi O.Bektenov.
Sybaılas jemqorlyqqa qarsy is-qımyl sharalaryn qabyldamaý – «Sybaılas jemqorlyqqa qarsy is-qımyl týraly» Zańda belgilengen birqatar talaptardy bildiredi. Bul – sybaılas jemqorlyqqa qarsy shekteýlerdi qabyldaý, múddeler qaqtyǵysyn boldyrmaý, qarjylyq baqylaý sharalary, basshylardyń tikeleı qaramaǵyndaǵy sybaılas jemqorlyq úshin derbes jaýapkershiligi, kvazımemlekettik sektorda komplaens-qyzmetterdi mindetti túrde engizý.
«Tıisinshe, Sybaılas jemqorlyqqa qarsy qyzmet qoldanystaǵy zańnamada qarastyrylǵan jemqorlyqqa qarsy is-qımyl boıynsha tıisti sharalar qabyldamaıtyn memlekettik organdardyń basshylary men laýazymdy tulǵalaryna ákimshilik yqpal etý sharalaryn qoldanýǵa ýákiletti», dedi ol.