9 sáýirde japonııalyq Anime Manga Pioneer School kompanııasynyń bilikti mamandary «Manga óneri» taqyrybynda sheberlik saǵatyn ótkizedi, dep habarlaıdy Egemen.kz Aqparat jáne qoǵamdyq damý mınıstrliginiń baspasóz qyzmetine silteme jasap.
Sondaı-aq kelesi aptada Ońtústik Koreıanyń Mýltıplıkasııalyq fılmderdi nasıhattaý agenttiginiń myqty anımatorlarymen (Korean Manhwa Contents Agency) «Mýltıplıkator mamandyǵynyń mańyzy» taqyrybynda motıvasııalyq sabaq ótkizý josparlanyp otyr.
Onyń aldynda Aqparat jáne qoǵamdyq damý mınıstrligi men Ońtústik Koreıanyń Mýltıplıkasııalyq fılmderdi nasıhattaý agenttigi arasynda osy anımasııalyq mekteptiń jumysyna baılanysty onlaın kezdesý ótken bolatyn. Jıynǵa qatysqan koreı agenttiginiń prezıdenti Shın Djong Choldiń aıtýynsha, erekshe bilim alý qajettilikteri bar balalardy anımasııaǵa baýlý Koreıada 10 jyl buryn bastaldy. Búginde Koreıada osyndaı 11 áleýmettik ortalyq jumys isteıtinin aıtty. Demek qazaqstandyq mamandarǵa bul baǵytta úzdik sheteldik tájirıbe almasý múmkindigi týyndap otyr.
Eske sala ketsek, Qazaqstan Táýelsizdiginiń 30 jyldyǵyna oraı QR AQDM bastamasymen iske qosylǵan «Balapan» telearnasynyń janyndaǵy «Erekshe bilim alý qajettilikteri bar balalarǵa arnalǵan anımasııa mektebi» alǵashqy sabaǵyn 12 naýryzda bastaǵan.
Elimizde tuńǵysh ret qolǵa alynyp otyrǵan bul jobanyń maqsaty: erekshe bilim alý qajettilikteri bar balalarǵa mamandyǵyna aınalatyn kásipti úıretý, áleýmettik beıimdeýge járdemdesý jáne olardyń bos ýaqytyn tıimdi uıymdastyrý.
- Kýrs bastalǵaly baıqaǵanymyz – oqýshylardyń anımasııa salasyn meńgerip, úırenýge degen ynta-yqylasy zor. Balalardyń oı-pikirin ashyq bildire alatyn ójet, talapty, bilimdi ári zerek ekendigi tipti qýantady, - deıdi «Balapan» telearnasynyń dırektory Maqpal Jumabaı.
Osy rette QR AQDM men «Balapan» telearnasyna nátıjeli kelissózder júrgizýge atsalysqan Qazaqstannyń Ońtústik Koreıa men Japonııadaǵy elshilikteriniń eńbegin atap ótken jón.