Eýrazııa ulttyq ýnıversıteti Fızıka-tehnıkalyq fakýltetiniń birinshi kýrs stýdentteri Maǵjan Sultanov pen Dıas Kamalov ýnıversıtettiń bas ǵımaraty janynda Aqbulaq ózeninde sýǵa batyp bara jatqan balany qutqaryp qaldy.
Oqıǵa 2021 jyldyń 26 naýryzy kúni keshke qaraı oryn alǵan. Ýnıversıtetten shyqqan stýdentter kómek surap aıqaılaǵan balanyń daýsyn estıdi. Dereý ózenge qaraı júgirip, sýǵa batyp bara jatqan 8-9 jastaǵy balany kóredi. Kóp oılanbastan olar kómekke asyǵady. Muzǵa qarmanǵan balany sýdan shyǵaryp, ústindegi kıimderin sheship, orap tastaıdy. Osy kezde JOO qyzmetkeri Botagóz Parathan jubaıymen birge jaqyn mańda júrgen, olardy avtokólikke salyp, balany úıine aparýdy usynady.
Úıge barǵan soń stýdentter balanyń sý bolǵan kıimin qurǵatyp kııýine kómektesip, jyly sýsyn berip, ata-anasyna oqıǵa týraly habarlaıdy. JOO-nyń baspasóz qyzmetine bergen suhbatynda Maǵjan óz qaýipsizdigi týraly bir mınýt ta oılanbaǵanyn aıtty. «Mende bir ǵana oı boldy, – deıdi ol. – Qaıtkende balany qutqarý!»
Maǵjannyń ózi – otbasyndaǵy jalǵyz ul. Ol ıadrolyq fızıka mamandyǵy boıynsha oqıdy. Bul mamandyqty tańdaǵanyna qýanyshty, óıtkeni ol atomdar men molekýlalarmen jumys istegendi unatady.
Al Dıas Kamalov Tehnıkalyq-fızıka mamandyǵy boıynsha bilim alady. Qostanaı oblysy Rýdnyı qalasynda týǵan, otbasynyń kenjesi. Maǵjanmen birge ol da mundaı sátterde qorqynysh týraly oılaýdyń ózi artyq dep esepteıdi.