Qostanaı oblysyna QR Sybaılas jemqorlyqqa qarsy is-qımyl agenttiginiń jumys toby tórtkúndik arnaıy issaparmen keldi, dep habarlaıdy Egemen.kz.
Top quramynda QR Agenttik tóraǵasynyń orynbasary Dmıtrıı Malahov, qoǵam qaıratkeri, «Parasat joly» respýblıkalyq ortalyǵynyń jetekshisi Sadyqbek Túgel, sondaı-aq Agenttik tóraǵasynyń keńesshisi Jazıra Jylqyshıeva bar.
Arnaıy jumys toby 12 sáýirde oblys ortalyǵyndaǵy «Qostanaı adaldyq alańy» jobalyq keńsesiniń jumysymen tanysyp, keńse qyzmetkerlerimen, arnaıy monıtorıngtik top jáne sybaılas jemqorlyqtyń aldyn-alýmen aınalysatyn aqparattyq shtab ókilderimen kezdesý ótkizdi. Sondaı-aq, Ishki ister mınıstrligine qarasty Sh.Qabylbaev atyndaǵy Qostanaı akademııasy ujymy men kýrsanttarynyń qatysýymen konferensııa ótkizdi. Odan keıin Tobyl qalasyna barǵan jumys toby «Tobyl – kómek alańy» front-ofısinde turǵyndardy qabyldap, Qostanaı aýdandyq ákimdiginiń janynan jumys isteıtin sybaılas jemqorlyqqa qarsy is-qımyl máseleleri jónindegi komıssııa otyrysyna qatysty.
Sybaılas jemqorlyqqa qarsy is-qımyl agenttiginiń ókilderi 13 sáýirde Altynsarın aýdanyn aralap, «Altynsarın – kómek alańynda» aýdan turǵyndaryn qabyldaıdy. Sondaı-aq, memlekettik qyzmetshilermen, bıýdjet qyzmetkerlerimen kezdesýdi josparlap otyr. Sonymen qatar, Sılantev aýylyndaǵy mádenıet úıinde «Parasat joly» klýbynyń otyrysyn ótkizedi. Jumys toby sapar sońynda jergilikti kásipkerlermen jáne aýdan belsendilerimen kezdesýdi kózdep otyr.
Jumys saparynyń úshinshi kúni Áýlıekól aýdanynda jalǵasady. Agenttik ókilderi 14 sáýirde «Amanqaraǵaı – kómek alańy» front-ofısiniń jumysymen tanysyp, osy aýyldaǵy orta mekteptiń ustazdarymen, ata-analarmen kezdesedi. Odan keıin Áýlıekólge at basyn buryp, aýylsharýashylyq mamandaryn daıarlaıtyn aýdandyq kolledj muǵalimderimen dıdarlasady. Sondaı-aq, aýdan jurtshylyǵymen, jergilikti qoǵam belsendilerimen kezdesý josparlanǵan.
Agenttik ókilderi óńirge jumys saparynyń sońǵy kúni Qostanaıdaǵy L.Tolstoı atyndaǵy kitaphanada oblystyq «Parasat joly» klýbynyń múshelerimen jáne jergilikti zııaly qaýym ókilderimen bas qosady.