QR Ulttyq bankiniń tóraǵasy Erbolat Dosaev naýryz aıynda teńgeniń álsireýiniń sebepterin aıtty, dep habarlaıdy Egemen.kz.
«Bıylǵy naýryzda teńgeniń aıyrbastaý baǵamy kelesi sebeptermen bir AQSh dollary úshin 424,97 teńgege deıin 1,9 paıyzǵa álsiredi. Birinshiden, osy jylǵy naýryzda munaı baǵasy bir barrel úshin 63,54 AQSh dollaryna deıin 3,9 paıyzǵa tómendedi. Vaksınasııa qarqynynyń tómendeýine, jańa agressıvti COVID-19 shtamdarynyń paıda bolýyna jáne barynsha qatań oqshaýlaý sharalaryna oralýǵa baılanysty táýekelder energııa tasymaldaýshylarǵa suranysty qalpyna keltirý boıynsha ınvestorlardyń josparlaryna áser etti. Bıylǵy naýryzdyń qorytyndysy boıynsha AQSh-taǵy munaı qory da artty», dedi UB basshysy Úkimet otyrysynda.
Budan basqa, qazynashylyq oblıgasııalar kiristiliginiń ósýi aıasynda AQSh dollary damýshy naryqtardyń valıýtalaryna qatysty nyǵaıýda.
«Nátıjesinde, túrik lırasy 11,1 paıyzǵa, Indonezııa rýpııasy – 2 paıyzǵa, Reseı rýbli 1,6 paıyzǵa álsiredi. Bul rette, sanksııalar táýekelderiniń kúsheıýi jalpy úrdisterden basqa Reseı rýbliniń teris dınamıkasyna yqpal etti. Bul jaǵdaıda respýblıkalyq bıýdjetke transfertter bólý aıasynda Ulttyq qor aktıvterin konvertasııalaý men kvazımemlekettik sektor kompanııalarynyń eksporttyq valıýta túsiminiń bir bóligin satýy teńgege qoldaý kórsetti», dedi E. Dosaev.