Tobyl qalasyndaǵy «Altyn dán» mádenıet úıinde «Shańyraq» atty tuńǵysh óner ortalyǵy ashyldy, dep habarlaıdy Egemen.kz.
Jergilikti ónerpazdardyń aıtýynsha, atalmysh ortalyq Qostanaı aýdanyndaǵy qazaq dástúrli óneriniń damý belesindegi aıtýly oqıǵalardyń biri bolyp tabylady.
Ulttyq ortalyqtyń tusaýkeser rásimine oblystyq mádenıet basqarmasynyń basshysy Erlan Qalmaqov, aýdan ákiminiń orynbasary Ibrahım Bekmuhametov, óńirde dástúrli ónerdi nasıhattap júrgen ánshi-jyrshy, termeshi, kúıshiler men aýdandyq mádenıet úıiniń qyzmetkerleri qatysty.
- «Rýhanı jańǵyrý» baǵdarlamasy bastalǵan tórt jyl ishinde qanshama jumystar atqarylyp jatyr, kóptegen jobalar júzege asyryldy. Bizdiń Tobyl-Torǵaı óńirinde ulttyq ónerdi nasıhattaýǵa baǵyttalǵan jumystar jandanyp, jańa deńgeıge kóterildi. Mysaly, biz Saǵyn Jalmyshev atyndaǵy dástúrli dombyrashylar baıqaýyn, Nurjan Naýshabaev atyndaǵy dástúrli ánshiler baıqaýyn ótkizip kelemiz. Aldaǵy ýaqytta qobyzshylar baıqaýyn dástúrli túrde ótkizemiz degen oı bar. Osy sharalardyń barlyǵy da óńirde ulttyq ónerimizdi nasıhattap, óskeleń urpaqtyń boıyna sińirý maqsatynda júzege asyrylyp jatyr. Al endi búgingi ortalyqqa keletin bolsaq, qazigi tańda aýdandyq, sondaı-aq aýyldyq mádenıet úıleri men klýbtar múmkindiginshe ulttyq ónerimizdiń órken jaıýyna úles qosyp, biraz jyldardan beri osy baǵytta tabandy eńbek etip keledi. Alaıda buǵan deıin aýdan ortalyqtarynda qazaqtyń qadymnan jalǵasyp kele jatqan dástúrli óneriniń ár túrli janrlaryn ári qaraı jandandyratyn úılestirý ortalyǵy bolǵan joq. Sondyqtan Táýelsizdigimizdiń 30 jyldyǵy qarsańynda jáne «Rýhanı jańǵyrý» baǵdarlamasynyń aıasynda ashylyp jatqan tuńǵysh ortalyq aldaǵy ýaqytta ár jerde, ár aýylda júrgen dástúrli óner ókilderi men ujymdardyń basyn bir arnaǵa toǵystyryp, ulttyq ónerdiń ilgeri basýyna uıtqy bolady dep senemin. Bul ortalyqqa kelip, dombyra, kúı, jyr, terme úırenemin deıtin, boıynda azǵantaı bolsa da óner ushqyny bar kez kelgen jastaǵy adamǵa esik ashyq, dedi Erlan Qalmaqov.«Shańyraq» ulttyq óner ortalyǵynyń alǵa qoıyp otyrǵan maqsattarynyń biri - kúı ónerin damytý, oblystaǵy kásibı kúıshilerdi tarta otyryp, talapty balalarǵa, áýesqoı dombyrashylarǵa arnalǵan sheberlik synyptaryn, úıirme jumystaryn jandandyrý bolyp tabylady. Saltanatty rásimde belgili bolǵan taǵy bir súıinshi jańalyq, taıaýda ǵana respýblıkalyq Kúıshiler odaǵynyń Qostanaı oblystyq fılıaly qurylypty. Odaq fılıalynyń tizginin ustaǵan óńirge belgili kúıshi Batyrbek Baınazarovjınalǵan kópshilikke oblystyq kúıshiler odaǵy aldaǵy ýaqytta jańa tusaýy kesilgen ulttyq óner ortalyǵynyń qabyrǵasynda jumys isteıtinin jetkizdi.
- «Shańyraq» ortalyǵy bolashaqta tek Qostanaı aýdanynyń ǵana emes, ózge de óńirlerdegi kúıshilerdiń basyn qosyp, ózara tájirıbe almasatyn úlken óner ordasyna aınalady. Birneshe jyldan beri jumys istep jatqan respýblıkalyq Kúıshiler odaǵynyń fılıaly bıyl alǵash ret Qostanaı oblysynda da quryldy. Basty maqsatymyz – el ishinde kúıshilik ónerdi damytý, kezinde osy óńirde óner dánin shashqan ataqty kúıshi-kompozıtorlardyń murasyn nasıhattap, dástúrli mektep qalyptastyrýǵa talpynys jasaý, sondaı-aq oblysymyzdaǵy dáýlesker kúıshilerimizdi el kóleminde ótip turatyn respýblıkalyq, halyqaralyq deńgeıdegi baıqaýlar men festıvaldarǵa jiberý, dedi oblystyq fılıal jetekshisi Batyrbek Baınazarov.Tobyl qalasy oblys ortalyǵyna tıip tur, onyń ústine munda ulttyq saz aspaptary ansambli, qazaq ulttyq orkestri bar. Dástúrli ónerdi ómirine azyq etken ónerpazdar da osy aýdannan jıi shyǵady. Sondyqtan ulttyq ónerdiń órisin keńeıtýge jol ashatyn tuńǵysh ortalyqtyń da osyQostanaı aýdanynda ashylýy zańdy sııaqty.
Saltanatty shara sońynda «Shańyraq» ulttyq óner ortalyǵynyń mamandary jınalǵandardy «Tulǵalar tuǵyry» atty qanatqaqty jobamen tanystyrdy. Jobanyń maqsaty – aýdan turǵyndaryna óńirde ulttyq mádenıettiń damýyna eleýli úles qosqan óner qaıratkerleriniń ómiri men shyǵarmashylyǵyn nasıhattaý.