Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov qaladaǵy epıdemııalyq ahýal týraly aıtty. Basqarma basshysynyń sózinshe, elordada epıdemııalyq jaǵdaı turaqsyz. Qala ınfeksııa juqtyrý boıynsha áli de «qyzyl aımaqta». Orta eseppen KVI-men kúndelikti 430 jańa jaǵdaı tirkelip otyr. Bul byltyrǵy shilde aıyna qaraǵanda kóbirek.
«Elordada koronavırýspen aýyratyndardy emdeý úshin 14 aýrýhana tartyldy. Atalǵan aýrýhanalarda 1 889 oryn bar. Búgingi kúni 985 naýqas aýrýhanalarda em qabyldap jatyr. Onyń ishinde koronavırýs 901 adamda rastalǵan jáne 84 adam pnevmonııamen em qabyldaýda. Jansaqtaý bóliminde 95 adam bar, onyń 21 ókpeni jasandy tynystandyrý apparatynda jatyr. Sonymen qatar 4 myńǵa jýyq adam úıde ambýlatorly em qabyldaýda», deıdi T.Muratov.
Sonymen qatar ol elordada azamattardy aldyn ala jazý boıynsha vaksınalaý bastalǵanyn baıandady. Onyń sózinshe, ujymdyq ımmýnıtetti qalyptastyrý úshin 600 myńnan astam adamǵa nemese qala turǵyndarynyń kem degende 60%-yna vaksına egý josparlanǵan.
«Búginde elordada 22 500-den astam adam koronavırýsqa qarsy vaksına saldyrdy. Bul – medısınalyq qyzmetkerler, oqytýshylar, quqyq qorǵaý organdarynyń, dıplomatııalyq qyzmettegi qyzmetkerler jáne sozylmaly aýrýy bar adamdar. Vaksınadan keıin asqynýlar tirkelmegen. Osy aptada qala turǵyndarynyń aldyn ala jazylýy boıynsha jappaı vaksınalaý bastaldy. Iаǵnı koronavırýs ınfeksııasyna qarsy vaksınany alǵysy keletin adamnyń barlyǵy óz erkimen jazylyp, endi emhanalardan shaqyrýdy kútýde», dedi T.Muratov.
Aıta ketetin taǵy bir jaıt, densaýlyq saqtaý basqarmasy astanalyqtardy vaksınalaýdyń algorıtmin jasaǵan.
«Koronavırýsqa qarsy ekpe alǵysy keletinder eki jol arqyly ótinish qaldyra alady. Azamattar eGov portaly arqyly ózderine yńǵaıly ýaqytta jáne orynda vaksına alýǵa ótinish qaldyra alady. Ekpe jasaıtyn mekemelerdiń tizimi eGov portalynda bar. Dáriger azamatty vaksına alý tizimine qosqan soń, oǵan jeke nómirine SMS-habarlama keledi. Ol jerde ýaqyty, vaksına jasalatyn jerdiń mekenjaıy kórsetiledi», dep atap ótti ol.
Vaksına alǵan adamdar 30 mınýt boıy dárigerdiń baqylaýynda bolady.
«Halyqty vaksınamen qamtý úshin medısınalyq uıymdarda egý pýnktteriniń sany 36-dan 100-ge deıin kóbeıtildi. Sondaı-aq halyqtyń ekpe alýy qoljetimdi bolýy úshin sanıtarlyq-epıdemıologııalyq baqylaý departamentimen birge vaksınalaý pýnktterin qalanyń saýda jáne oıyn-saýyq ortalyqtarynda ornalastyrýdy josparlap otyrmyz. Qazirgi tańda «Mega Silk Way» SOSO-da barlyq sanıtarlyq-epıdemııalyq talapty eskere otyryp, halyqty vaksınalaýǵa daıyndyq jumystary júrgizilýde. Onda eki brıgada túske deıin jáne eki brıgada tústen keıin jumys isteıdi. Brıgadalar dárigerler men medbıkelerden quralǵan», dep túsindirdi basqarma basshysy.
Sáýir aıynda Almatyǵa shamamen 400 myń doza vaksına jetkiziledi dep kútilýde. Mundaı derekti Almaty qalalyq qoǵamdyq densaýlyq saqtaý basqarmasynyń bastyǵy Narıman Tabynbaev keltirdi.
«Almatyda vaksınalaý bastalǵaly 68 650 vaksına keldi. Ekpeni 49 160 adam saldyrdy. Qazir qalada 19 490 vaksına bar. Bizge 13 sáýirge deıin 69 myń vaksına kelý kerek. Aıdyń sońyna deıin taǵy 300 myńnan astam vaksına alý josparlanyp otyr. Bul san áli naqtylanatyn bolady, qazir arnaıy shtab quryldy. Bul dozalardyń barlyǵy vaksınalaý pýnktterine taratylady», dedi N.Tabynbaev.
Aıta ketetin jaıt, ótken aptadaǵy málimet boıynsha elimizde 313 611 adam vaksına saldyrdy.