Cońǵy jyldary Shymkente medısına salasynyń damýy qarqyn ala bastady. Onyń bir sebebi qala respýblıkalyq mártebe alyp, densaýlyq saqtaý salasyna qoldaý arta tústi. Ekinshiden, elimizdegi bilikti de bilimdi medısına bilgirleri shyraıly shaharǵa kelip qyzmet etýde. Máselen, transplantolog Abylaı Donbaıdyń ózi TMD elderinde suranysqa ıe maman ekendigin basy aýyryp, baltyry syzdaǵan jurttyń barlyǵy biledi.
Jýyrda shaharǵa neırohırýrgııanyń maıtalmany Myńjylqy Berdiqojaev qonys aýdaryp, №2 qalalyq aýrýhananyń bas dárigeri qyzmetine taǵaıyndalǵan bolatyn. Bilikti neırohırýrg Myńjylqy Berdiqojaev jańa jumys ornynda ınsýlt alyp, jedel járdemmen aýrýhanaǵa túsken 57 jastaǵy áıelge ota jasady.
«Naýqas sýbarahnoıdaldy qan quıylýmen alǵashqy anevrızma-gemorragııalyq ınsýltpen túsken. Oǵan mıdyń KT-da-sýbarahnoıdty qan ketý, KT angıografııasy jasalǵanda – sol jaq ishki karotıd arterııasynyń anevrızmasy anyqtaldy. Sondyqtan shuǵyl túrde jańa bıplan angıografynda rentgenendovaskýlıarlyq ádispen, ıaǵnı bas súıegin ashpaı ota jasaldy. Angıografta KT baqylaý operasııasy júrgizildi», deıdi neırohırýrg.
Dárigerdiń aıtýynsha, ota sátti jasalyp, qan ketý kózi joıylǵan. Ári qaraı naýqasqa emdeýdi tolyq júrgizýge bolady. Aıta keterligi, ótken jyly qalalyq aýrýhanaǵa sońǵy úlgidegi angeograf apparaty alynǵan bolatyn. Buryn basyna qan quıylǵan naýqasqa bas súıegin oıý arqyly ota jasalsa, jańa apparatpen mıǵa tamyr joldary arqyly ota jasalatyn boldy.
Eske salar bolsaq, Myńjylqy Saılaýuly elimizdegi neırohırrýgııa salasyn damytyp, álemdi moıyndatqan bilikti dáriger. Búginge deıin 5 myńnan asa bas mıynyń tamyrlaryna joǵary tehnologııalyq ádispen ota jasaǵan. Naýqastyń qan tamyrlarynyń ishine ota jasap kele jatqanyna 12 jyldan asty. Tipti týma aýytqýy bolǵan sábılerdiń de mı tamyrlaryna sátti operasııa jasap, saýyqtyryp shyǵaryp keledi.