Mýzeı-qoryq arheologtary «Han molasy» qazbasyndaǵy erekshe qabirhanany topyraqtan ashý boıynsha zertteý jumystaryna kiristi, dep habarlaıdy Egemen.kz Mádenıet jáne sport mınıstrliginiń baspasóz qyzmetine silteme jasap.
Byltyr mýzeı-qoryq arheologtary 1861 jyly áskerı topograf A.E. Alekseevtiń syzǵan Saraıshyq qalasynyń syzba-kartasynda belgilengen «Han molasy» ornyna arheologııalyq qazba jumysyn júrgizgen bolatyn.
Bul jerde «Han molasy» bolǵany jóninde halyq aýzynda aıtylatyn etnografııalyq materıaldar da rastaıtyn. Biraq qazba ornynda anyqtalǵan erekshe qabirhanany túgeldeı ashý úshin qazbany keńeıtýge osy mańda jerlengen eski beıitter kedergi keltirgen edi.
Bıyl Atyraý oblysy əkimdigi men Mahambet aýdany əkimdigi qoldaýymen jáne demeýshilerdiń kómegimen «Han molasy» qazbasy mańynda jerlengen 20 beıitti kóshirý jumystary júrgizildi. Ol jumystar 30 naýryz ben 4 sáýir aralyǵynda ótti.
Osydan 150-70 jyl buryn jerlengen adam súıekteri jańa zıratqa qaıta jerlendi. Mýzeı-qoryq mamandary bul jerlengen adamdardyń aǵaıyn-týystarymen túsindirý jumystaryn júrgizip, olarmen kelisimge qol jetkizgen bolatyn. Qazirgi kezde mýzeı-qoryq arheologtary «Han molasy» qazbasyndaǵy erekshe qabirhanany topyraqtan ashý boıynsha zertteý jumystaryna kiristi.