Qaraǵandy qalasynyń polısııa qyzmetkerleri Qyzyl kitapqa engizilgen janýarlardyń 274 múıizin tárkiledi, dep habarlaıdy Egemen.kz Polisia.kz saıtyna silteme jasap.
15 sáýirde Krımınaldyq polısııa bóliminiń jedel ýákilderi múıiz satý salasyndaǵy qylmystardy anyqtaý jáne jolyn kesý kezinde Qaraǵandy oblysy Jańaarqa aýdany aýyldarynyń birinde 34 jastaǵy er adam basqarǵan avtokólikti ustady.– Bul kóliktiń ishinde Jańaarqa aýdanynyń 34 jastaǵy turǵyny jáne Qaraǵandy qalasynyń 28 jastaǵy eki turǵyny boldy. Tekserý jáne tergeý áreketteri barysynda polıseıler kólik ishinen 274 kıik múıizi men túrli markaly qarýdy tárkiledi, – dedi oblystyq polısııa departamenti bastyǵynyń orynbasary Ábil Ábildın.
Atalǵan fakt boıynsha QR Qylmystyq kodeksiniń 339-baby (Sırek kezdesetin jáne quryp ketý qaýpi tóngen túrlerge, sondaı-aq tyıym salynǵan ósimdik nemese janýarlar túrlerine, olardyń bólikterine nemese týyndylaryna zańsyz qatynas jasaý) boıynsha sotqa deıingi tergeý bastaldy. Osy baptyń sanksııasy jeti jylǵa deıin bas bostandyǵynan aıyrý túrindegi jazany qarastyrady. Sondaı-aq QR Qylmystyq kodeksi 287 baby (Zańsyz atys qarýyn saqtaý) boıynsha is qozǵaldy. Qazirgi ýaqytta tergeý amaldary júrgizilip jatyr. Ustalǵandar ýaqytsha qamaýǵa alyndy.