Bıyl elordada 16 úlken mektep salynady. Bul týraly Nur-Sultan qalasynyń ákimi Altaı Kólginov Instagram paraqshasynda jazdy, dep habarlaıdy Egemen.kz.
«Búgin qalany aralaý barysynda birqatar mekteptiń qurylys barysymen tanystym. Oqjetpes pen Sh.Bókeev (Saryarqa aýdany) kósheleriniń qıylysynda ornalasqan mektep qurylysy uzaqqa sozyldy. Mektep qurylysy 2017 jyly bastaldy. Qurylysty qalpyna keltirý úshin jobalyq-smetalyq qujattamaǵa túzetý júrgizildi, qarjylandyrý bólindi. Osylaısha mekteptiń qurylysy qaıta bastaldy. Atalǵan mektep eki aýysymda 2400 oqýshy ornyn qurýǵa múmkindik beredi. Bul sol aýdan turǵyndarynyń qajettiligin qanaǵattandyrýǵa múmkindik beredi», dep jazdy ákim.
Sondaı-aq ol Memleket basshysy barǵan №23 orta mektep aýmaǵynda bes qabatty mekteptiń qurylysy júrip jatqanyn aıtty. Oqý orny О́ndiris eldi mekeninde (Baıqońyr aýdany) ornalasqan.
«Bıyl ótken jyldarmen salystyrǵanda kóbirek mektep salamyz. Úlken 16 mektep salynbaq. Olar bıyl 40 myńnan astam oqýshy ornyn qurýǵa múmkindik beredi. О́tken jylmen salystyrǵanda oqýshy oryndarynyń sany 2 eseden artyq, al 2019 jylmen salystyrǵanda 4 eseden artyq ulǵaıady. Keshendi jospar aıasynda 5 jyldyq kezeńde 50-ge jýyq memlekettik mektep salý josparlanǵan. Sondaı-aq mektep qurylysyna jeke ınvestısııalar tartamyz. Investısııalyq keńesterde 30-dan astam jekemenshik oqý oryndarynyń qurylysy qoldaý tapty. Úsh aýysymdy oqytý jáne tyǵyzdalǵan rejımi bar mektepter sanyn azaıtý boıynsha júıeli jumys júrgizýdemiz», dep jazdy elorda ákimi.