29 sáýirde Parıjde ótetin Ekonomıkalyq yntymaqtastyq jónindegi Qazaqstan–Fransııa Úkimetaralyq komıssııasynyń 14-otyrysy qarsańynda Qazaqstan Respýblıkasynyń Indýstrııa jáne ınfraqurylymdyq damý mınıstri Beıbit Atamqulov pen Fransııanyń Eýropa jáne syrtqy ister mınıstri janyndaǵy delegat-mınıstr Frank Rıester onlaın rejımde ekijaqty kezdesý ótkizdi, dep habarlaıdy Egemen.kz IIDM baspasóz qyzmetine silteme jasap.
COVID-19 pandemııasy jáne soǵan baılanysty engizilgen sanıtarlyq shekteý sharalary 2020 jyly elder arasyndaǵy iskerlik belsendilikke áser etip, nátıjesinde taýar aınalymy 2,8 mlrd AQSh dollary shamasynda boldy.
Frank Rıester búgingi tańda Qazaqstanmen ýran, munaı-gaz, tıtan óndirisinde, mashına jasaý salasynda, qurylys materıaldaryn, dári-dármek, tamaq ónimderin óndirýde jáne basqa da salalarda birqatar iri ınvestısııalyq jobalar iske asyrylǵanyn atap ótti.
Sońǵy 15 jylda Fransııa Qazaqstanǵa 16 mlrd AQSh dollary kóleminde ınvestısııa salǵan.
Kezdesý barysynda Mınıstrler ýran óndirý, jolaýshylar jáne júk lokomotıvterin shyǵarý salasyndaǵy máselelerdi talqylady. Airbus tobymen birlesken jobalardy iske asyrý jáne yntymaqtastyqty jolǵa qoıýǵa úlken kóńil bólindi. Jańartylatyn energııa kózderi, aýyl sharýashylyǵy jáne sıfrlandyrý salasyndaǵy jańa jobalar talqyǵa salyndy.
Kezdesý sońynda taraptar bir-birine rızashylyqtaryn bildirip, Qazaqstan men Fransııa arasyndaǵy qarym-qatynasty odan ári damytýdyń mańyzdylyǵyn atap ótti.