Tobyl qalasynda satırık, etnograf-ǵalym Seıit Kenjeahmetov atyndaǵy «Mirdiń oǵy» respýblıkalyq ázil-syqaq teatrlary festıvali bastaldy. Aýqymdy shara «Rýhanı jańǵyrý» baǵdarlamasy aıasynda uıymdastyrylyp otyr. Úsh kúnge sozylatyn óner merekesine satıra sardarynyń urpaqtary men belgili satırık Kópen Ámirbek arnaıy keldi, dep habarlaıdy Egemen.kz.
Ázil-syqaq merekesiniń alǵashqy kezeńi bastalmas buryn uıymdastyrýshylar óńirlik kommýnıkasııalar qyzmetinde arnaıy baspasóz májilisin ótkizdi.
- Seıit aǵamyzdyń bizge qaldyrǵan murasy óte kóp. О́ner festıvalin qalamgerdiń satıra janrynda qaldyryp ketken muralaryn dáripteý maqsatynda uıymdastyryp otyrmyz. Búgingi festıvlge elimizdiń ár óńirinen ónerpazdar kelip jatyr. Olar qoǵamdaǵy keleńsiz jaǵdaılardy kúlki arqyly kórsetip, astarly oılaryn bildirmek, – dedi oblystyq mádenıet basqarmasynyń basshysy Erlan Qalmaqov.
Baspasóz jıynynda Kópen Ámirbek pen Seıit Kenjeahmetovtyń qyzy Zámzágúl Kenjeahmetova obylstyq mádenıet basqarmasyna rızashylyq bildirip, aldaǵy ýaqytta óner festıvali Nur-Sultan qalasynda ótse quba-qup degen tilek aıtty.
«Mirdiń oǵy» alǵash ret 2019 jyly Arqalyq qalasynda tusaýyn kesken. Búginde aýqymy keńeıip, festıvalǵa qatysýshylardyń sany da artyp otyr. Tobyl tórinde jalaýyn kótergen satıra festıvaline Aqtóbe, Almaty, Batys Qazaqstan, Jambyl, Mańǵystaý, Qostanaı oblystarynyń ázil syqaq teatrlary qatysady.