Qyzylorda qalasynyń irgesindegi polıgonda táýligine – 17, jylyna 60 myń tonnaǵa jýyq qatty turmystyq qaldyqtar suryptalyp, qaıta óńdeledi. О́tken jyldyń tamyz aıynda jumysyn bastaǵan kásiporynda qazir 9 tehnıka, 35 adam jumys istep jatyr.
Polıgon oblys ortalyǵynyń irgesindegi Belkól kentinen 7,5 shaqyrym qashyqtyqta ornalasqan. Ekologııalyq-sanıtarlyq talaptarǵa sáıkes qaldyqtardy óńdeý úlesin arttyrý baǵytynda salynǵan keshendegi qurylǵylar Reseıde jasalǵan. Qazir aýmaǵy 20 gektarlyq polıgonǵa orta eseppen kúnine 110 tonna qaldyq qabyldanady.
Jýyrda keshenge Qyzylorda qalasynyń ákimi Ǵanıbek Qazantaev baryp, atqarylyp jatqan jumys barysyn kórdi. Polıgonda osyǵan deıin 115 tonna plastmassa, shyny, qaǵaz, tústi metall qaldyqtary suryptalyp, tıisti kásiporyndarǵa jóneltilgen. Eń bastysy, keshen iske qosylǵaly jıylǵan qoqystardy órteý toqtatylyp, Belkól kentine jetetin tútin ıisi tyıylypty.
Qala ákimi keshenge qoqys jetkizetin «Qyzylorda tazalyǵy» mekemesiniń de jumysyn kórdi. Seriktestik shtatyndaǵy júmysshylar men qoǵamdyq jumyspen qamtý arqyly kelgenderdi qosqanda, munda 618 adam jumys isteıdi. Mekeme osy jumysshylar men 137 arnaıy tehnıka kúshimen oblys ortalyǵyndaǵy 800-den asa kósheniń tazalyǵyn saqtap otyr.
Qyzylorda oblysy