Búginde ony Kendebaı dep ataıtyndar da bar. Bul ertegidegi Kendebaıdaı batyr bolmasa da ónerin, adamı bolmysy men qazaqqa tán qasıetterin baǵalaǵan kópshiliktiń qoıǵan aty ekeni málim.
Tehnıkanyń tilin jetik meńgergen bolgar jigiti qazaq ánderin shyrqaǵanda jurt súısinedi. Akkordeonyn alyp, aýyldastarynyń toıynda asabalyq etken onyń qazaqshasy qaıran qaldyrady. Sózge sheshen, qazaq tiliniń bilgiri, bolgar etnosynyń ókili Gennadıı Stomatov ózin Shámshiniń inisi sanaıdy. Onyń ózindik sebepteri de joq emes.
Derekterge júginsek, 1936-1951 jyldar aralyǵynda stalındik qýǵyn-súrginge ulttyq nyshanyna baılanysty 3 600 000 adam ilikken eken. Barlyǵy 17 ulttyń ókilderi deportasııaǵa ushyrady. Stomatovtar otbasy solardyń biri. Otyrar aýdanyna 1939 jyly Moldavııadan kúshtep kóshirilgen otbasynyń otaǵasy Vıktor Stomatov kolhozda dúkenshi, jumysshy bolyp istegen. Al onyń uly Gennadıı segizjyldyqty bitirisimen mehanızatorlyqty meńgerip, aýylda qalýdy uıǵarǵan. Zeınetkerlikke shyqqansha ujymsharda traktor, kombaın júrgizip, aýdannyń damýyna óz úlesin qosqan. Al akkordeonmen ózin súıemeldep án shyrqaý bala kúnnen bergi hobbıi. Qazaqsha maqal-máteldiń maıyn tamyza aıtar sheshen asaba retinde daralanǵan daryn ıesi negizinen Shámshi Qaldaıaqovtyń ánderin oryndaıdy. Baıqaýlarǵa da qatysqan. «Qazaq elinde dúnıege kelgen ulty basqa adamnyń qazaq tilin jetik meńgergenine tańqalmaý kerek, óıtkeni ol zańdylyq. Aýylda týyp-óstim, dostarym, joldastarymnyń bári qazaq. Ákemiz sonaý 1939 jyly kóship kelgen kezdegi qıyndyqtardy aıtyp otyratyn. Qazaq halqynyń baýyrmaldyǵyn, qonaqjaılyǵyn, meıirimin biz de sezip, kórip óstik. О́zgesiń dep shettetken, qyryn qaraǵan emes. Yntymaǵy jarasqan, birligi bekem elde barlyq qýanysh pen qıyndyqty birge bólisip, biz de bir áýletke aınaldyq. Elimizdegi yntymaq, birlik, qarqyndy damý Elbasy Nursultan Nazarbaevtyń jáne onyń sarabdal saıasatyn utymdy jalǵastyryp kele jatqan Prezıdent Qasym-Jomart Toqaevtyń saıasatynyń nátıjesi ekeni anyq. Jeńgeń bola ma, álde apa dersiń jubaıym Vera ekeýmiz 2 ul, 4 qyz tárbıelep, nemere súıip otyrmyz. Qudalarymyzdyń biri – qazaq, endi biri – tatar, tatýmyz. Qazaqtyń birtýar uly Shámshini aǵa tutamyn. Kisiligi, azamattyǵy joǵary ony pir tutamyn, ánderin erekshe unatamyn. Aǵamyzben talaı kezdesip, dastarqandas bolǵanbyz. Ekeýmiz bir óńirdiń týmasymyz ǵoı. Men de osy Otyrar aýdany Kóksaraı aýylynda dúnıege kelgenmin. Jas kezimizde talaı toıdy basqarǵanbyz, sonda kóbine Shámshiniń ánderin shyrqaımyn. Iá, 1997 jyly Jambylda ótken Shámshi ánderiniń baıqaýynda júldeli úshinshi oryndy ıelendim. Áli de akkordeonymdy alyp, shaqyrǵan jerlerde Shámshi ánderin shyrqap júrmin», deıdi bizben áńgimesinde Gennadıı Vıktoruly.
Al Gennadıı Stomatovtyń jubaıy Verany Kóksaraı jurtshylyǵy kindik sheshemiz dep erekshe syılaıdy. 1 mamyr – Qazaqstan halqynyń birligi kúni polıak qyzy Vera apamyz úshin aıryqsha mereke. Eldegi birliktiń, yntymaqty tirliktiń arqasynda ósip-óngen jurtty bul kún merekeli kóńil kúımen taǵy bir bas qosyp, ótkendi eske alyp, erteńge oı júgirtýge múmkindik beredi. Vera Pýstovalova ózi turatyn shalǵaıdaǵy qazaq aýylyna sharapaty tıgen dáriger. Polıak qyzy akýsher-dáriger retinde Kóksaraı aýylynda dúnıege kelgen talaı qazaq balasyna 1970 jyldan beri kindik sheshe atanyp júr. Balalarynyń, tipti nemereleriniń de Veradaı kópshil, meıirimdi bolǵanyn qalap kindigin kestirgender kóp. Otyrar aýdany Kóksaraı aýylynda turatyn ol, uzaq jyldar boıy «Qarakól», «Sheńgeldi» syndy eldi mekenderde akýsher-dáriger bolyp jumys istedi. Aýdan ortalyǵynan shalǵaıda ornalasqan talaı anany bosandyryp talaı otbasyn qýanyshqa bóledi. Aýyldastary Verany kóshede kóre qalsa qushaǵyna alyp, úıine shaqyryp qurmettep tórge shyǵarady. Syrdyń jaǵasynda turatyn Stomatov otbasy osyndaǵy qazaqtarmen bite qaınasyp, quda-qudandaly bolyp ketken. Qazaqy dástúrdi berik saqtaǵan berekeli otbasy. Vera apamyz da úzeńgiles dos-jarandarynyń bári aýyl qazaqtary ekenin aıtady. «Qazaq halqynyń qonaqjaılyǵyn qurmetteımin. Ásirese, bir-birine degen baýyrmaldyq, qol ushyn sozyp kómektesetin «Asar» degen qaıyrymy mol saýapty istiń saqtalýyn, úzilmeýin qalaımyn. Bizderdi baýyryndaı kórgen qazaq halqyna alǵysymyz sheksiz», deıdi Vera Pýstovalova. Búginde Gennadıı men Vera beınettiń zeınetin kórip otyrǵan jany jaısań, qazaqtyń tilin, salt-dástúrin qurmettep, aýyldastarynyń qýanyshyna ortaqtasyp júrgen ónerli de, óreli jandar.