Taıaýda DSM Bas memlekettik sanıtar dárigeri Erlan Qııasovtyń 30 sáýirdegi №17 qaýlysy boıynsha vaksınalaý tártibine ózgerister engizildi. Osy qaýlyǵa sáıkes 21 sáýirden bastap «Spýtnık V» vaksınasyn saldyrǵan qazaqstandyqtardyń ekinshi dozany alý ıntervaly ózgerdi, dep habarlaıdy Egemen.kz
«Vaksınasııany eki kezeńmen júrgizedi: eń aldymen 0,5 ml dozada I komponentpen, sodan keıin vaksınasııa kúnin eseptemegende 45 kúnnen keıin - 0,5 ml dozada II komponentpen; bul rette 45-shi kúnge II komponentpen vaksınasııa júrgizý múmkin bolmaǵan jaǵdaıda (demalys, mereke kúnderine sáıkes kelý, basqa eldi mekenge shyǵý jáne basqalar) vaksınasııany 90 kún ishinde júrgizýge jol beriledi; vaksınasııanyń osy kýrsy 2021 jylǵy 21 sáýirden bastap «Gam-KOVID-Vak» vaksınasynyń birinshi komponentin alǵan adamdarǵa engiziledi», dep jazylǵan qaýlyda.
Qujat 2021 jylǵy 3 mamyrda saǵat 00-den bastap kúshine endi. Aıta ketsek, bıyl sáýir aıynyń sońynda Reseıdiń N.Gamaleı atyndaǵy Epıdemıologııa jáne mıkrobıologııa ulttyq zertteý ortalyǵynyń dırektory Aleksandr Gınsbýrg vaksınalaý merzimine qatysty málimdeme jasady. Bul jaıynda «Spýtnıka V» Telegram kanalynda jarııalandy.
«Bizdiń ortalyqta daıarlanǵan «Spýtnık V» vaksınasyna toqtalsaq, sheteldik seriktesterdiń suraýy boıynsha tıisti jaýapty joldaımyz. Osy oraıda olardyń ótinimi boıynsha sheteldik naryqtarda vaksınanyń birinshi jáne ekinshi komponentterin engizý arasyndaǵy ıntervaldy buryn bekitilgen eń az yqtımal 21 kúnnen úsh aıǵa deıin ulǵaıtýǵa bolady dep sanaımyz», dedi Aleksandr Gınsbýrg.
Ǵalymnyń aıtýynsha, ıntervaldy 21 kúninnen 3 aıǵa deıin arttyrý vaksına qalyptastyratyn ımmýndyq jaýaptyń kúshine áser etpeıdi, sondaı-aq keıbir jaǵdaıda ony uzartýy da múmkin.
«Mundaı paıymǵa uqsas adenovırýstyq platformada vaksınalardy paıdalaný tájirıbesine súıenip, sondaı-aq Reseı men shet memleketterde jappaı vaksınalaý boıynsha tabysty naýqandar negizinde kelip otyrmyz», dep naqtylady professor. Bul turǵyda árbir ulttyq retteýshi óz erkimen birinshi jáne ekinshi komponetterdi egý arasyndaǵy ıntervaldy 21 kún aralyqta qaldyrý nemese ony 3 aıǵa deıin uzartý týraly sheshimdi qabyldaı alady. Aleksandr Gınsbýrgniń aıtýynsha, Reseı tarapy óz aýmaǵynda vaksınanyń birinshi jáne ekinshi dozasy arasyndaǵy ıntervaldy burynǵy merzimde qaldyryp otyr. Osynyń barlyǵyn eskere otyryp, jaqynda KVI-ǵa qarsy vaksınasııalaý kestesin ózgertý máselesi boıynsha QR Bas memlekettik sanıtarııalyq dárigeri Erlan Qııasov túsinikteme berdi.
«Qazaqstan Respýblıkasynyń Bas memlekettik sanıtarııalyq dárigeriniń 2021 jylǵy 30 sáýirdegi № 17 qaýlysyna sáıkes «Spýtnık V» vaksınasymen vaksınasııalaý kestesine ózgerister engizildi. Bul rette osy vaksınanyń birinshi jáne ekinshi komponentterin engizý arasyndaǵy ınterval 45 kúndi quraýy tıis. Ekinshi komponentpen 45-shi kúni vaksınasııa júrgizý múmkin bolmaǵan jaǵdaıda (demalys, mereke kúnderine tuspa-tus kelý, basqa eldi mekenge shyǵý jáne basqalary) ekpeni 90 kún ishinde júrgizýge jol beriledi. Vaksınasııa kestesine qatysty bul ustanym professor, RǴA akademıgi, Gamaleı atyndaǵy epıdemıologııa jáne mıkrobıologııa ulttyq zertteý ortalyǵynyń dırektory A.Gınsbýrgtyń 2021 jylǵy 22 sáýirdegi resmı málimdemesine negizdelgen», dedi E.Qııasov.
Atalǵan málimdemege sáıkes, «Spýtnık V» vaksınasynyń birinshi jáne ekinshi komponentterin engizý arasyndaǵy ıntervaldy eń az yqtımal 21 kúnnen 90 kúnge deıin ulǵaıtýǵa bolady jáne ıntervaldy ulǵaıtý ımmýndyq jaýaptyń kúshine áser etpeıdi.
Bul halyqty ımmýndaýdy aıtarlyqtaı jyldamdatýǵa múmkindik beredi. Keıbir jaǵdaılarda ıntervaldy uzartý adamnyń ımmýndyq reaksııasynyń kúshi men uzaqtyǵynyń artýyna ákeledi.