Qostanaı oblysynda sáýir aıynda bastalǵan «Taza Qazaqstan» jáne «Taza jaǵalaý» senbilik sharalary aıasynda óńirdegi eldi mekenderdiń aınalasyndaǵy júzdegen gektar alqap qoqystan tazartyldy. Búkil oblys aýmaǵyn qamtyǵan ekologııalyq aksııaǵa túrli óndiristik kásiporyndardyń jumysshylary, memlekettik qyzmetshiler, oqý mekemeleriniń ujymdary men erikti jastar atsalysyp jatyr.
Senbilik barysynda oblys ortalyǵynyń ózinen ǵana 300 tonnadan astam qoqys shyǵaryldy. Tobyl ózeniniń jaǵalaýy, sondaı-aq qalanyń shetindegi jeke turǵyn úılerdiń mańyndaǵy ashyq alańqaılar qoqys úıindilerinen tazartylyp, ornyna aǵash kóshetteri otyrǵyzyldy. Tazalyq aksııasyn uıymdastyrýshylardyń aıtýynsha, qoqystan arshylǵan alańqaılarǵa myńǵa jýyq aǵash kóshetteri otyrǵyzylǵan.
– Bıyl jalpyqalalyq senbilikti erterek bastap kettik. Tazalyq naýqanyna Qostanaı qalasynyń ózinen 1,5 myń adam jumyldyrylyp otyr. Buǵan merdiger mekemelerdiń qosqan úlesi zor ekenin atap ótý kerek. Ortasha eseppen ólshep kórsek, ár sharshy metrden úsh kılo qoqys shyǵaryppyz. Mundaı ekologııalyq senbilikter eki aı boıy jalǵasatyn bolady, – dedi qala ákiminiń orynbasary Saıat Shaımurynov.
Qorshaǵan ortany tazartý, kógaldandyrý jumystary Lısakov qalasynda da júrip jatyr. Shaǵyn shaharda bıylǵy kóktemde bir jarym myńǵa deıin tal egiledi. Qala turǵyndary ótken senbiliktiń ózinde 1200 túp terek, qaıyń, qaraǵaı kóshetterin otyrǵyzdy. Sondaı-aq mekemeler men mektep janyndaǵy alańqaılar kógaldandyrylyp, qalaǵa kire beris joldardyń shetine jáne meshit janyndaǵy Krasnooktıabr boksıt kenishi basqarmasy salǵan úıdiń aldyna tal egildi. Shahar basshysy Almat Ismaǵulovtyń aıtýynsha, qalany abattandyrý sharalaryna jastar resýrstyq ortalyǵy men memlekettik organdardyń ókilderi, meshit qyzmetkerleri, ardagerler keńesiniń músheleri men jergilikti Lısakov tehnıkalyq kolledjiniń eriktileri qatysqan.
Al Arqalyqta qala ishin abattandyrýǵa qatysqan jastarǵa kádimgideı aqsha tólenedi. Qaladaǵy 16 men 29 jas aralyǵyndaǵy jastar «Jasyl el» memlekettik baǵdarlamasyna tirkelgen soń, qysqamerzimdi maýsymdyq jumystarǵa tartylady. Bastysy, belsendi jastarǵa 40500 teńge kóleminde aılyq tólenedi. Memlekettik baǵdarlamany qala ákimdiginiń turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspeksııasy bóliminiń tapsyrysy boıynsha «Jastar azamattyq bastamalary» ortalyǵy júzege asyrady. Bul maqsatqa jergilikti bıýdjetten 12 mln teńge bólingen. Sáýir aıynan qyrkúıek aıyna deıin jalǵasatyn tazalyq naýqanyna 120 belsendi jas tartylyp otyr. Ortalyq mamandarynyń sózinshe, «Jasyl el» baǵdarlamasy aıasynda Arqalyqta jalpy aýqymy 5 myń sharshy metr bolatyn alańqaılarǵa aǵash kóshetteri men gúlzarlar otyrǵyzylmaq. Olardy kútip-baptaý jaǵy da «Jasyl el» jastaryna júktelip otyr. Baǵdarlama boıynsha qalalyq ákimdik ǵımaratynyń aýmaǵyn, barlyq saıabaqtar men alańdardy kógaldandyrý, sondaı-aq qala irgesindegi sýdyń jaǵasyn retke keltirý josparlanǵan. Taıaýda 20 jasyleldik bastaǵan jastardyń alǵashqy legi qalany abattandyrý jumystaryn bastap ketti.
Qostanaı oblysy