«Eńbek resýrstaryn damytý ortalyǵy» AQ daıyndaǵan orta merzimdi boljamǵa sáıkes bazalyq (neǵurlym yqtımal) ssenarııde Qazaqstanda 2021-2025 jyldar aralyǵyndaǵy kezeńde jaldamaly eńbekke degen suranys shamamen 1 mln adamdy quraıdy, dep habarlaıdy Egemen.kz.
Optımıstik ssenarıı boıynsha bul kórsetkishter birshama joǵary bolady: jaldamaly eńbekke suranystyń kólemi 5 jylda 1,2 mln adamdy, al teris ssenarıı boıynsha 792,9 myń adamdy quraıdy dep boljanýda.
Negizinen jaldamaly eńbekke degen suranys bilim berý salasynda qalyptasady, onda ol ssenarııge baılanysty jıyntyq eńbekke qatysty 16-18%-dy quraıdy, sondaı-aq aýyl sharýashylyǵy sektorynda (7,6-dan 10% - ǵa deıin) jáne óńdeý ónerkásibinde (9,7-10,2%) qalyptasady.
2021-2025 jyldar ishinde bazalyq ssenarııde jaldamaly jumyskerlerge jıyntyq suranys jańa suranystan 55,3%-ǵa (574 myń) jáne almastyrý boıynsha suranystan 44,7%-ǵa (464,4 myń) qalyptasady dep kútilýde, olardyń 72%-y (332,7 myń) zeınetkerlik jasqa jetken qyzmetkerlerdi almastyrýǵa keledi.
Jaldamaly jumyskerlerge bir jyldaǵy jıyntyq suranys 2025 jyly 244,3 myń adamdy quraıdy, onyń ishinde 148,7 myńy jańa suranysty jáne 95,6 myńy almastyrý boıynsha suranysty bildiretin bolady.
Zeınetkerlik jasqa jetýine baılanysty jumyskerlerdi almastyrý qajettiligi osy kezeńge qaraı 15%-ǵa (2021 jylǵy 59,2 myńnan 2025 jyly 68,3 myńǵa deıin) ósedi dep kútilýde.
Jaldamaly jumyskerlerdiń eń kóp 5 jyldyq qajettiligi olardyń jas ereksheligine jáne ózge de tabıǵı sebepterge baılanysty ketýi saldarynan bilim berý salasynda (64,5 myń adam), sondaı-aq aýyl sharýashylyǵynda (44,6 myń adam) jáne óńdeý ónerkásibinde (44,2 myń adam) bolady.
Jalpy alǵanda, 2025 jylǵa qaraı bazalyq ssenarıı boıynsha jumys kúshiniń sany 9,3 mln adamdy quraıdy, onyń 7,7-si jaldamaly jumyskerler bolady, al 1,2 mln adam jumyspen qamtylǵan halyqtyń basqa sanattaryn quraıdy. Bul rette jumyssyzdar sany 439 myń adamdy quraıdy dep kútilýde, ıaǵnı jumyssyzdyq deńgeıi 4,7% deńgeıinde bolady.
Optımıstik ssenarııde jumys kúshiniń sany 9,4 mln adamdy quraıdy, onyń ishinde jaldamaly jumyskerler – 7,9 mln, jumyspen qamtylǵandardyń ózge sanattary – 1,1 mln adam, al jumyssyzdar sany 442 myń adam.
«Teris ssenarııde 2025 jylǵa qaraı jumys kúshiniń quramynda 9,3 mln adam bolady dep kútilýde, olardyń 7,5 mln-y jaldamaly jumyskerler, al 1,4 mln-y ózge jumyspen qamtylǵan adamdar. Bul rette jumyssyzdar sany 436 myń adamdy quraıdy. Bizdiń boljamymyz boıynsha jumyssyzdyq deńgeıin kútiletin 4,7% - ǵa deıin birtindep tómendetý júretin bolady. Aǵymdaǵy jáne kelesi jyly biz 5%-ǵa jetýimiz múmkin, sodan keıin bul kórsetkish jylyna 0,1 j.t. tómendeıdi», dep habarlady ERDO Boljamdaý departamentiniń dırektory Dmıtrıı Shýmekov.