«Ashyq» qosymshasy AppStore-dan joǵalyp ketti, dep habarlaıdy Egemen.kz.
Joba avtorlarynyń biri áleýmettik jelide «barlyq kinárat tólemdi durys júrgizbeýimizden» dep jazdy.
«Abonenttik tólemdi ýaqytyly júrgizdik. Biraq basqa adamnyń atynan tóleppiz. Osyǵan baılanysty mobıldi qosymshany platformadan alyp tastaǵan. Bıyldan bastap tólem tártibi ózgergenin esten shyǵaryp aldyq. Jaqyn ýaqytta barlyǵyn qalpyna keltiremiz», dedi «Ashyq» mobıldi qosymshasyn ázirleýshi Vıtalıı Pýstovoıtenko.
iOS platformasyna mobıldi qosymshany ornatý úshin buryn basqa adamnyń atynan aqy aýdarýǵa ruqsat edi. Alaıda sońǵy ózgerister boıynsha joba ıesi endi tek óz atynan tóleýi kerek. Sondyqtan iOS júıesindegiler «Ashyq» mobıldi qosymshasyn kóp uzamaı smartfondaryna qaıta júkteı alady.
Al Android qoldanýshylary úshin qazirdiń ózinde qoljetimdi. Aıta ketken jón, baǵdarlamany 720 myńnan astam azamat júktegen. Qosymshany 1 táýlik ishinde shamamen 126 myń adam paıdalanady.