Asa iri kólemde memleket qarjysyn jymqyrdy degen kúdikpen ustalǵan Densaýlyq saqtaý eks-mınıstri Eljan Birtanov tergeýden qashyp ketýi múmkin. Osylaı degen prokýror ony qaıtadan úıqamaqqa alyp, jumysqa shyǵarmaýdy surady, dep habarlaıdy Egemen.kz Informbıýro jańalyqtar qyzmetine silteme jasap.
«Tergeý barysynda Eljan Birtanovtyń úıqamaqta otyrǵanda otbasy múshelerinen bólek basqa da adamdarmen, qorǵaýshylarmen de sóılesýge tyıym salynǵanyna qaramastan olarmen birneshe ret arlasqanyn anyqtady. Sondaı-aq, kúdikti Birtanov pen onyń jaqyndarynyń atynda shetelde jyljymaıtyn múlik tirkelgen jáne turýǵa ruqsaty bar ekenin anyqtap otyr», dedi prokýror Tólegen Jaraspaev.
Prokýror eks-mınıstrdiń shetelge qashyp ketýinen kúdiktenetinin aıtady. Sol sebepti Eljan Birtanovtyń úıqamaqta otyrý merzimin 14 maýsymǵa deıin, ıaǵnı taǵy 1 aıǵa sozýdy surady. Biraq, buǵan kelispeıtin Birtanovtyń qorǵaýshylary ony eshqaıda shyqpaý týraly qolhatpen bosatýyn surady.
Buǵan deıin, 1 jarym mıllıard jymqyrdy degen kúdikpen ustalǵan eks-mınıstrdiń úıqamaq merzimi 14 mamyrǵa deıin uzartylyp, tańǵy 8-den keshki 7-ge deıin jumys isteýine ruqsat berilgen edi. Sot prosesi qaıta jalǵasatyn bolady.