Saryaǵash APB-niń qyzmetkerlerine belgisiz bireýlerdiń «Qyzyl kitapqa» engen aqbókenniń múıizin zańsyz satýmen aınalysyp jatqany jaıly shuǵyl aqparat túsken, dep habarlaıdy Egemen.kz.
Atalǵan jaıtty saryaǵashtyq polıseıler QR QK-niń 339-babynyń 1-bóligi (О́simdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) boıynsha tirkep, izdestirý jumystaryn júrgizdi.
Nátıjesinde Saryaǵash APB men Ulttyq qaýipsizdik komıtetiniń qyzmetkerleri birlesip, táýlik ishinde qylmysqa qatysy bar brakonerdi ustady. Sondaı-aq kúdikti azamattyń úıinen aıǵaq zat retinde 35 keli bolatyn aqbóken múıizi tárkilendi. Keltirilgen shyǵyn kólemi bes mıllıon teńgege jýyq.
Belgili bolǵandaı kúdiktiniń Qaraǵandy oblysynyń jergilikti turǵyny ekeni anyqtaldy. Búgingi tańda kúdikti azamat Saryaǵash aýdandyq polısııa bólimine jetkizilip, sotqa deıingi tergep-tekserý amaldary júrgizilýde.
Túrkistan oblysynyń polıseıleri turǵyndardan jáne qonaqtardan tabıǵatty qorǵaý zańnamasyn buzbaýǵa jáne quryp ketý qaýpi tónip turǵan «Qyzyl kitapqa» engen jan-janýarlar men ósimdikterge qurmetpen qaraýǵa shaqyrady.