Alapat órt aıtarlyqtaı shyǵyn keltirdi

Oblys basshylyǵy tilsiz jaýdan zardap shekken turǵyndardyń barlyǵyna kómek kórsetiletinin aıtyp sendirdi. Áý basta tutanǵan ot eki gektardaı jerdegi qurǵaq shópke ǵana jaıylǵan. Ony sóndirý úshin oblystyq Tótenshe jaǵdaılar departamentiniń qyzmetkerleri jumyldyrylǵanymen, tilsiz jaý báseńdemegen. Sekýndyna 20 metr jyldamdyqpen soqqan jel órtti odan ármen órshite túsken. Jasyl jelekti jalmaǵan jalyn alty tehnıka, júz shaqty órt sóndirýshige boı bermegen soń MI-8 jáne MI-2 áýeormanqorǵaý tikushaǵy kókke kóterildi. Sonyń ózinde alapat órt eldi mekenge enip úlgergen. Rıdder qalasynyń shetkeri jaǵyndaǵy Leshoz shaǵyn aýdanyndaǵy otyzdan astam úı otqa oranyp, 81 turǵyn qaýipsiz jerge kóshirildi.

Olardyń on úshi jataqhanaǵa jaı­ǵassa, qalǵany týǵan-týystarynyń úıine ornalasty. Al japa shekken eki azamat jansaqtaý bóliminde jatyr. Mamandardyń aıtýynsha, 72 jastaǵy er adamnyń jaǵdaıy tym aýyr. Denesiniń 88 paıyzy kúıip qalǵan. О́kinishke qaraı, adam shyǵyny boldy. 1948 jylǵy áıel órtte mert boldy. Apat aıtyp kelmeıdi degen osy. Áp-sátte úı-kúısiz qalǵan tur­­ǵyndarǵa memleket tarapynan kómek kórsetiledi.

– Bizdiń óńir úshin óte aýyr jaǵdaı boldy. Úkimet pen oblys ákimdigi tarapy­nan sizderge jan-jaqty qoldaý men kómek kórsetiledi. О́rtten zardap shek­kenderdiń barlyǵy baspana alady. Bul jumys – el Prezıdenti Qasym-Jomart Toqaevtyń erekshe baqy­laýynda, – dedi aımaq basshysy Danıal Ahmetov.

Oblys ákiminiń aıtýynsha, Rıdderde salynyp bitpegen birneshe kópqabatty úı bar. Endigi ýaqytta qabyrǵasy kir­­­­pish­pen qalanǵan bul úılerdiń qurylysy aıaqtalyp, baspanasyz qal­ǵan turǵyndarǵa berilmek. Zardap shek­kenderdiń barlyǵyna qala ortalyǵyna jaqyn jańa shaǵyn aýdanda sý qubyry men úı janyndaǵy ýchaskesi bar aýma­ǵy 80 sharshy metr turǵyn úı tegin be­riledi. Qazirdiń ózinde qala sáýletshisi 35 úıge jer telimin bóledi, qurylys ja­­qyn kúnderi bastalady. Qurylys mate­rıaldaryn Semeı kirpish zaýyty usynyp otyr.

«Qazsınk» profılaktorııine kó­shiril­gender qurylystyń sońyna deıin tegin orynjaımen jáne tamaq­pen qamtamasyz etiledi. Budan bas­qa ká­siporyn bank kartalaryn resimdegen­nen keıin árbir otbasyna 1 mıllıon teń­geden aýdarady.

– Qurylys kompanııalarymen birge úılerdi baǵalap shyǵamyz. Aldyn ala esep boıynsha, turǵyn úı máselesin tolyq sheshý úshin bizge eki jarym aı qajet. Kimde-kim kópqabatty turǵyn úıden bas tartyp, eskisin jóndeýdi talap etse, ony jóndep berý máselesi de qarastyrylady, – dedi óńir basshysy.

Eldiń endigi tilegi – aıtylǵan jospardyń oryndalýy. Áıtpese úıip-tógip berilgen ýádelerdiń qar jaýyp, iz basylǵan soń umytylyp ketpesine kim kepil?! Ásirese, qaǵaz jumystary soz­balańǵa salynbaı ma degen kúdik bar turǵyndarda. Alaıda qujattardy qal­pyna keltirý jumystarymen Polısııa departamenti jáne Halyqqa qyzmet kórsetý ortalyǵy búginnen bastap aınalysa bastaıdy. Barlyq qujat birizdi tártippen retke keltiriledi. Múliktik shyǵyndar da zańǵa sáıkes óteledi. Ony anyqtaý úshin arnaıy komıssııa jumys istep, shyǵyndardyń qunyn anyqtaıdy.

– О́rt sóndirýshiler erte kelse, mun­shama shyǵyn oryn almas edi. Eń qıyny baspanamyzdan aıyryldyq. Birin­shi kezekte jeke kýáligimdi aldym. Endi munyń bári sozbalańǵa salyn­baı, júıeli túrde sheshimin tapsa eken, – deıdi úıiniń kúli kókke ushqan rıdderlik Leshoz kentiniń turǵyny Lıdııa Karpova.

Ras, aıdyń-kúnniń amanynda alańsyz otyrǵan turǵyndar úshin aýyr soqqy boldy. Úı-jaıymen qosa qora-qopsy, bes avtokólik órtengen. Qanshama ormandy alqap otqa orandy?! Aınalany sharpyǵan jalyn tek tańǵy saǵat je­tiler shamasynda ǵana aýyzdyqtalǵan. Polısııa qyzmetkerleri ottyń shyǵýyna qatysy bar kúdiktini ustady. Bul týraly О́skemende ótken brıfıngte oblystyq Tótenshe jaǵdaılar departamenti bas­tyǵynyń orynbasary, azamattyq qorǵaý polkovnıgi Qanat Ábdilov pen Polısııa departamenti bastyǵynyń orynbasary, polısııa podpolkovnıgi Eldos Zákimov aıtyp berdi.

– Naqtysyn aıtsaq, órttiń jalpy aýdany 283 gektardy qurady. Onyń 15 gektary Rıdder qalasynyń ákimshilik aýmaǵyna tıesili. О́rt bes kóshedegi 59 turǵyn úıge qaýip tóndirdi. Mundaǵy 83 adamnyń 10-y – balalar. Adamdardy jaıǵastyrý, as-sý jetkizý jumystary uıym­dastyryldy. Materıaldyq shy­ǵyndy anyqtaý úshin komıssııa quryl­dy, – dedi Qanat Ábdilov.

Al  Eldos Zákimovtiń aıtýynsha, otty abaısyz paıdalanyp, iri zalal keltirý faktisi boıynsha Rıdder qalasynyń 35 jasar turǵyny kúdikti retinde qolǵa tústi. Tergeý amaldary bastaldy. Kinási tolyq dáleldengen jaǵdaıda, qylmyskerge 2000 AEK kóleminde aıyp­pul salynýy nemese 2 jylǵa bas bostandyǵynan aıyrylýy múmkin.

– Qylmystyq kodekstiń 204-baby­nyń 2-bóligine sáıkes sotqa deıingi tergeý áreketteri bastaldy. Kúdikti – bu­ryn-sońdy sotty bolmaǵan Rıd­der qalasynyń turǵyny. Polısııa de­partamenti qurǵan arnaıy jedel-tergeý tobynyń qyzmetkerleri beınejazbalardy zerttep, kýálardyń jaýaptaryn muqııat tekserip jatyr. Tıisti sot saraptamalary taǵaıyndaldy. Qyl­mystyq isti tergeý jumystary Ishki ister mınıstrliginiń baqylaýyna alyndy, – dedi Eldos Zákimov.

Quqyq qorǵaý organdary kúdiktini tergep jatar. Al japa shekken tur­ǵyn­darǵa kómek qolyn sozý úshin uıym­shyldyq tanytqan halyq jer-jerlerde qor ashyp, eńsesi túsken elge demeý bolýda.

Shyǵys Qazaqstan oblysy,

Rıdder qalasy