Indet jaılap júrgenine jurt áli de óz basyna túspegen soń senbeı, túrli jel sózge erik berip otyrsa da, bul keselden kóz jumyp jatqandar bar ma, bar. Osy joldar jazylyp jatqan kezde Almatyda 3,5 myń adam aýrýhanada indetpen kúresip, janymen alysyp jatyr deýge bolady. Sońǵy kúnderi megapolıste indettiń taralýy báseń tartqandaı bolǵanymen, tek 9 mamyrda 570 adamnyń jańadan indet juqtyrǵany tirkeldi.
Barlyq ınfeksııalyq stasıonarlarda 3 513 naýqas emdelip jatsa, onyń ishinde 108 bala, KVI juqtyrǵandardyń 80%-dan astamynda aýrý belgileri bar. Biraq qoı dese de, qoımaı toılatyp, saıran salyp júrgender jetkilikti. Osy mereke kúnderi megapolıstegi «Pınta», «Hazbin», «V shatrah», «Dostar», «Mıata» sııaqty karantın tártibine kónbeıtin dámhana, bar, túngi klýbtar qatary anyqtaldy.
Monıtorıngtik toptar 20 naýryz ben 10 mamyr aralyǵynda júzdegen mekemelerdi tekserip, 795 karantın shekteýlerin buzǵandardy anyqtady. Sondaı-aq 3 320 jeke tulǵaǵa ákimshilik aıyppul salyndy. Tekserýshiler demalys kúnderi de jumysyn toqtatqan joq. Oıyn-saýyq mekemeleriniń karantındik sharalardy saqtaýyn tekserý 7 mamyrǵa qaraǵan túni jáne dúısenbige deıin kúsheıtildi. Tekserý barysynda polısııa, ákimdik jáne kásipkerler palatasy qyzmetkerlerinen turatyn mobıldi toptar qoǵamdyq tamaqtaný, saýda nysandaryn, kompıýterlik jáne loto klýbtardy aralap kórdi.
Mobıldi top ókilderiniń aıtýynsha, Almatynyń saýda jáne qoǵamdyq tamaqtaný oryndarynda COVID-19 boıynsha epıdemııaǵa qarsy talaptardyń saqtalýyna monıtorıng kún saıyn, demalys kúnderi jáne túnde júrgizilgen. Mysaly, 7 mamyrǵa qaraǵan túni Almatyda karantındik sharalardyń buzýshylyqtary «V shatrah» meıramhanasynda oryn alǵan. Onda 40-qa jýyq kelýshi bolǵan. Sondaı-aq Almaly aýdanynda 40 kelýshi bolǵan «Loto klýb» jumys istegen. 8 mamyrǵa qaraǵan túni Bostandyq aýdanynyń monıtorıngtik tobynyń ókilderi «Pınta» barynda buzýshylyqtardy anyqtady. Sol túni sol aýdanda «Hazbin» túngi klýby jumys istedi, onda shamamen 80 adam boldy. 9 mamyrdan 10 mamyrǵa qaraǵan túni qalada tártipke baǵynbaǵan taǵy 11 nysan anyqtaldy. О́kinishke qaraı, áli de Almaty turǵyndary men qonaqtarynyń bári birdeı pandemııa jaǵdaıynda ómir súrip jatqanymyzdy este saqtamaıdy. Dámhana men meıramhanalarǵa toptalyp barý tyıylmaı tur. Qadaǵalamasa, qyzmetkerler de betperde kımeıdi, ákimshiler óz mekemelerine belgilengen ýaqyttan artyq jumys isteýge múmkindik beredi – nátıjesinde osynyń barlyǵy indettiń juqtyrý qaýpin arttyryp otyr. Onyń ústine mýtasııalanǵan brıtandyq jáne ońtústikafrıkalyq KVI shtamdarynyń aınalymyna baılanysty sımptomatıkalyq naýqastardyń sany kóbeıip tur.
Búgingi tańda Almatyda 214 vaksınalaý pýnkti jumys isteıdi, barlyǵy Almaty qalasynyń 250 myń turǵyny vaksınalandy. Ujymdyq ımmýnıtetti qalyptastyrý jáne pandemııaǵa deıingi ómirge oralý úshin megapolıs halqynyń 60-75%-yn vaksınalaý qajet.
ALMATY