Ulttyq teatr óneriniń negizin qalaǵan úrkerdeı toptyń ishindegi úlken óner ıesi, Qazaqstannyń halyq ártisi Serke Qojamqulovtyń 125 jyldyq mereıtoıy jarty ǵasyrdan astam ózi eńbek etken M.Áýezov atyndaǵy drama teatrynan bastaý aldy.
Qabyrǵasynda ulylardyń izi, tabanynyń izi qalǵan qara shańyraq óner ordasy birtýarlaryn ulyqtaı biletin ulaǵatty ulttyń urpaǵy ekenin kórsetip, Qazaqstan táýelsizdiginiń 30 jyldyǵyna oraılastyra sahna alybynyń ómiri men shyǵarmashylyǵyna arnalǵan «Qazaq sahnasynyń iri tulǵasy» atty taqyryptyq kórme, kórermenmen brıfıng uıymdastyryp, ótken kúnge ǵıbratty saıahat jasady.
О́nerdegi jolyn rejısser bolyp bastap, sonaý Qyzylorda qalasynda ýyǵyn shanshyǵan alǵashqy qazaq teatrynda Myrqymbaı, Qońqaı, Espembet, Kóbik, Qarabaılardyń rólin oınap, týma talanty keleshek sahna sańlaǵy ekeninen habar bergen Serke Qojamqulov ózi uıystyrǵan ordada taban aýdarmaı 54 jyl qyzmet etip, 170-ten astam keıipker obrazynda kórindi. О́zinen keıingi talaı býynnyń ulttyq bastaý-bulaqtan qanyp iship, halyqtyq ónerdiń jyldam ári durys órkendeýi jolynda talmaı qyzmet etti. Onyń qazaq kıno jáne teatr ónerine sińirgen eńbegin keler urpaqqa talmaı nasıhattaý– búgingi izbasarlarynyń paryzy. Almatydaǵy kórmege ártistiń atyn ıelengen Jezǵazǵan mýzykalyq drama teatrynyń ókilderi arnaıy kelip qatysyp, teatrdyń búgingi tynys-tirshiligimen tanystyrdy.
Asyldyń synyǵy, P.Chaıkovskıı atyndaǵy Almaty mýzyka kolledjiniń aǵa oqytýshysy Márııam Seráliqyzynyń esteligi úlken-kishini tegis tolqytty. «Jezqazǵan oblystyq qazaq mýzykalyq teatryna ákemniń atynyń berilgenine bıyl qyryq jyl tolyp otyr. Soǵan baılanysty teatr ujymyn jáne ákemniń atyn qurmetteıtin ónersúıer qaýymdy urpaqtarynyń atynan quttyqtaımyn. 1981 jyly ákemizdiń aty berilgennen bastap jas Jezqazǵan teatrynyń ujymy ózine kórsetilgen senimdi aqtaı bildi. Seráli ákemniń ómiri men óneri ózinshe bir óshpeıtin máńgilik dúnıe. Qazaq óneriniń irgetasyn kótergenderdiń qatarynda esimi erekshe, qurmetpen atalatyn, taýsylmaıtyn taý bulaǵy. Ákemiz sahnada zor sheberlik úlgisin kórsetken akter. О́ner degen – syrsandyq. Asyl qazynasy syrtynda emes, ishinde saqtaýly. Men úshin aıdan anyq bir aqıqat bar, ol – halyqqa jasaǵan qyzmet tulǵanyń ózine úlken qurmet bolyp oralady eken. Ákemniń ómiri – sonyń dáleli. M.Áýezov atyndaǵy qazaq ulttyq teatryna Táýelsizdiktiń 30 jyldyǵy qurmetine Seráli Qojamqulovtyń mereıtoıyn ótkizgeni úshin otbasymyzdyń atynan rahmetimdi aıtamyn» dedi.
Serke Qojamqulov ózinen keıingi jastardy tárbıeleýde aǵaǵa tán irilik tanytyp, qolynan kelgenshe olardyń óneriniń ulttyq baǵytta óristeýin qadaǵalaǵan. О́nerin qadirlegen kórermen iltıpatyna tereń jaýapkershilikpen qarap, sol qurmetke laıyq bolýdy bir sátke jadynan shyǵarmaǵan. Bul týraly rejısser, Qazaqstannyń eńbek sińirgen qaıratkeri Áýbákir Rahımov óz esteliginde baıan etti. «Ol kezde stýdentpin. Keshki spektaklge kirmek bolyp, bılet alýǵa kassa kezeginde tursam, ataǵy jer jarǵan Seraǵań da elmen birge kezek kútip tur eken. «Seraǵa, siz kire bermeýshi me edińiz?» dep edim, «Bolmaıdy!» dep short kesti ádepki birbetkeı minezinen tanbaı. «Men halyqtan úlken emespin. Kezekke turyp, bıletimdi alyp kiremin». Kórermenge budan asqan qurmet bolmas. Úlken býyndaǵy akterler elge degen qurmetimen, súıispenshiligimen erekshelendi. Ol kisi ujymǵa da, halyqqa da erekshe qadirli boldy, soǵan qaramastan ǵajap kishipeıil, eshqashan daýys kóterip, renjip sóıleýdi bilmeıtin edi. Birde «Qobylandy» spektaklinen keıin kópshilik sahnasyndaǵy jas akterler kıimderin ońdy-soldy laqtyryp, shashyp ketken eken, solardy jınastyryp júrsem, Seraǵań esiktiń bosaǵasynda maǵan qarap turypty. «Qap, qazir jerge qazyq qyp qaǵatyn boldy-aý» dep oıladym ishimnen. «Á-á-á, jaraıdy, jınap bolǵan soń, júr menimen», dedi. «E-e, jınatyp alǵan soń soıyp salaıyn dep tur eken», dep izinen ilesip, ekeýmiz Seraǵańnyń grım bólmesine keldik. «Kir» dedi. Kirdim. «Munda bir nárse shashylyp jatyr ma?» «Joq». «Onda dostaryńa baryp aıt. Olardyń kıimin bireý jınaýǵa mindetti emes, kıimderin shashpaı, sońyn jınap júrsin».
Serke Qojamqulovtyń sahna ónerine súıispenshiliginiń bıik bolǵany sonsha, ómiriniń sońynda densaýlyǵy syr berip naýqastanyp júrip te, ózi oınamasa da kún qurǵatpaı teatrǵa kelip, repetısııaǵa qatysyp júrgen eken. Qaıtys bolarynan bir apta buryn ádettegideı úıinen kelip, repetısııadan soń jas áriptesterin shyǵaryp salyp, sahnaǵa baryp jalǵyz ózi otyrady. Uzaq otyrady. Jan-jaǵynda eshkim joq. Qalyń qastary qabaǵyn jaýyp, kúlip turatyn júzin muń torlap, shókelep otyrǵan kúıi zaldyń ár buryshyna janaryn toqtatyp, zerikkeninshe zer sala qarap, biraz damyldaıdy. Saıypqyrannyń sahnany qımaı, ishteı egilip qoshtasyp otyrǵanyn syrt qaraǵan adamdar sezbeıdi de. «Bul Seraǵańnyń teatrǵa aqyrǵy ret kelýi eken. Bir aptadan soń aqtyq saparyna attanyp ketti» deıdi Á.Rahımov.
Mereıtoı qarsańynda M.Áýezov teatrynyń mýzeıi men S.Qojamqulov atyndaǵy Jezqazǵan drama teatry birlesip, Nur-sultan qalasynyń turǵyndary úshin Ulttyq mýzeıde ártistiń ómiri men shyǵarmashylyǵyna baılanysty aýqymdy kórme uıymdastyrǵan bolatyn. Serke tutynǵan buıymdar, jeke qujattary, sahnalyq kostıýmderi, basqa da qundy muralar jınaqtalǵan kóshpeli kórme aldaǵy ýaqytta oblys ortalyqtaryn aralap, teatr tarlanynyń óneri men ómirin ólke kórermenderine tanystyrýdy jalǵastyrady.