Nur-Sultan kóshelerindegi taǵy 15 jolǵa «Bus Lane» arnaıy jolaqtary engiziledi. Olardyń jalpy uzyndyǵy 42,3 shaqyrymdy quraıdy, dep habarlaıdy Egemen.kz.
2021-2022 jyldarda qoǵamdyq kólikke arnalǵan «Bus Lane» jolaǵy A. Baıtursynov, J. Nájimedenov, Q. Muhamedhanov, Túrkistan kósheleri, Jeńis, Abylaı han, Qabanbaı batyr, Turan, B. Momyshuly, Táýelsizdik (3-bóligi), Uly Dala, Máńgilik El, R. Qoshqarbaev dańǵyldarynda iske qosylady. «Bus Lane» jobasynyń maqsaty – jolaýshylardyń yńǵaıly jol júrýine jaǵdaı jasaý jáne qoǵamdyq kólik qozǵalysyna basymdyq berý.
Alǵashynda arnaıy joldar Abylaı han dańǵylynan Saraıshyq kóshesine deıingi B. Momyshuly dańǵylynda jáne Ýálıhanov kóshesinen Saryarqa kóshesine deıingi bólikterdegi Bógenbaı batyr dańǵylynda paıda boldy. Birinshi bóliktiń uzyndyǵy – 2,84, ekinshisiniń uzyndyǵy – 2,15 shaqyrymdy qurady. Búgingi kúni Nur-Sultanda 21 jolda uzyndyǵy 51 shaqyrymdyq avtobýs jelisi bar.
«Búginde qoǵamdyq kóliktiń biregeı paıdalanýshylarynyń sany 550 myńnan astam adam (elorda halqynyń 46%). Qoǵamdyq kólikpen kún saıyn 500 000 sapar jasalady. «Bus Lane» arqyly qoǵamdyq kólik quraldarynyń júrý tıimdiligi 25%-ǵa jetedi jáne jol júrý ýaqytyn 12,5 mınýtqa qysqartady. Mysaly, avtobýs arnaıy bólingen 15 shaqyrymdyq jolaqpen júrgende onyń jol júrý ýaqyty 37,5 mınýtty quraıdy, «Bus Lane» bolmasa – 50 mın. Bólingen jolaqtardy keńeıtý, bolashaqta qoǵamdyq kólikti damytýǵa oń áserin tıgizedi. О́z kezeginde, bul avtobýstardyń jol júrý ýaqytyn qosymsha 14%-ǵa qysqartady. Budan basqa, kestelerdi 160-tan astam birlikke ońtaıly qaıta bólý arqyly, avtobýs tapshylyǵyn qysqartady.
Jalpy alǵanda, kóbeıtiletin jolaqtardy eskere kele, «Bus Lane» baǵdar jelisiniń 23% qamtıtyn bolady. Engiziletin bólikter tiziminen qala mańy jáne qalalyq baǵyttar úshin mańyzdy kólik arterııasy – Qabanbaı batyr dańǵylyn bólek qarastyrý qajet. Ol jolmen kún saıyn 7 qala mańy jáne 8 qalalyq baǵyttar júredi. Bul – 192 avtobýs», deıdi «City Transportation Systems» JShS Basqarma Tóraǵasy Bekmyrza Igenberdınov.