Almatydaǵy Qazaqstan Qorǵanys mınıstrligi Bitimgerlik daıarlyq ortalyǵynda «BUU-nyń shtabtyq ofıserleri» (United Nations Staff Officer Course) atty eki aptalyq halyqaralyq kýrs bastaldy. Oǵan 25 tyńdaýshy qatysýda.
Atalǵan kýrstyń maqsaty – BUU-nyń bitimgerlik operasııalaryna qatysatyn shtabtyq ofıserlerdi daıarlaý.
Resmı ashylý saltanatyndaǵy sóılegen sózinde Bitimgershilik daıarlyq ortalyǵynyń bastyǵy polkovnık Baýyrjan Nyǵmetýllın Qazaqstannyń beıbitshilikti qoldaý jónindegi halyqaralyq kúsh-jiger men bolashaq bitimgerlerdi daıarlaý prosesine qanshalyqty mán beretinin atap ótti. Sondaı-aq ol koronavırýs pandemııasymen jahandyq kúreske baılanysty barlyq shekteýlerge qaramastan, qazaqstandyq tarap barlyq talaptardy eskere otyryp, óz aýmaǵynda osy kýrsty halyqaralyq deńgeıde ótkizýdi uıymdastyra alǵanyn jetkizdi.
Qazaqstan Qarýly Kúshteriniń áskerı qyzmetshilerinen basqa munda Ulttyq ulannyń, Tótenshe jaǵdaılar mınıstrliginiń ókilderi, sonymen birge Ulybrıtanııanyń, Ispanııanyń, Qyrǵyzstan men Mozambıktiń tyńdaýshylary oqıdy.
Oqý barysynda olar BUU-nyń qurylymyn, qaǵıdalary men prosedýralaryn, bitimgerlik qyzmetti qadaǵalaıtyn quqyqtyq aıasy, sheshimderdi josparlaý men qabyldaý úderisterin, bólimder men bitimgerlerde halyqaralyq shtab qyzmetteriniń mindetterin úırenedi. Baǵdarlamada sondaı-aq úlgilik jaǵdaılar ssenarııi boıynsha kishi toptarda tájirıbe jumysy qarastyrylǵan.
Kýrsty bitirgen qatysýshylar shtabtyq ofıser retinde bilim alǵanyn rastaıtyn halyqaralyq sertıfıkattar alady.