Shymkent qalasynda «Aqyldy qala» jobasynyń negizinde erekshe aıaldama ornatyldy. Pılottyq rejımde júzege asyrylyp otyrǵan «Aqyldy aıaldama» jobasy jeke ınvestor qarajaty esebinen salynyp otyr, dep habarlaıdy Egemen.kz.
«Aqyldy aıaldama» tolyǵymen jabyq, onyń ishinde ınternet, salqyndatqysh, beınekamera, 2 dana LED ekran, wi-fi jáne basqarý paneli ornalasady. Al syrtqy betinde antıvandaldy jarnamaǵa arnalǵan ekran qoıylady.
Aıaldamanyń basty qańqasy, salqyndatqysh, beınekamera jáne syrtqy betinde antıvandaldy ekran ornatylǵan bolsa, búginde avtobýs mashrýtyn kórsetetin LED ekrandy ornatý isi júrgizilip jatyr. Qajetti qondyrǵylar tolyǵymen ornatylǵan soń halyqqa qyzmet kórsete bastaıdy.
Aldaǵy ýaqytta joba oń nátıje bergen jaǵdaıda, aqyldy aıaldamalardyń sanyn arttyrý josparlanýda.
Bul aıaldamalardyń erekshelikteri kóp. Máselen, syrttaǵy aýa temperatýrasy -10 gradýs bolǵan jaǵdaıda jylý júıesi birden iske qosylady. Bári «Aqyldy qala» júıesine qosylǵan.