Qazaqstan Respýblıkasy Prezıdenti Ákimshiligi Basshysynyń birinshi orynbasary Dáýren Abaevtyń tóraǵalyǵymen Qazaqstan Respýblıkasy Prezıdenti janyndaǵy jastar saıasaty jónindegi keńestiń kezekti XXIV otyrysy ótti, dep habarlaıdy Egemen.kz Aqordanyń resmı saıtyna silteme jasap.
Keńes otyrysynyń jumysyna Úkimet músheleri, Májilis depýtattary, respýblıkalyq jastar uıymdarynyń basshylary, jastar saıasaty salasyndaǵy sarapshylar, sondaı-aq, óńirlerdegi jastar saıasaty máselelerine jetekshilik etetin oblys ákimderiniń orynbasarlary qatysty.
– Táýelsizdik jyldarynda Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń basshylyǵymen elimizde jastar saıasatynyń negizi qalandy. Sol saıasattyń jalǵasy retinde, Prezıdent Qasym-Jomart Kemeluly Toqaev ta jastar máselesine aıryqsha basymdyq berip, únemi nazarda ustap otyrady. Sondaı-aq Memleket basshysynyń «Táýelsizdik bárinen qymbat» maqalasynda jastar saıasatyna qatysty birqatar tapsyrma berdi. Soǵan sáıkes, Qazaqstan Respýblıkasy Prezıdenti janyndaǵy Jastar saıasaty jónindegi keńestiń qyzmetin odan ári jetildirý qolǵa alyndy, – dedi Dáýren Abaev.
Qazaqstan Respýblıkasy Prezıdenti Ákimshiliginiń Ishki saıasat bólimi meńgerýshisiniń orynbasary, Keńes hatshysy Evgenıı Glotov Qazaqstan Respýblıkasy Prezıdenti janyndaǵy Jastar saıasaty jónindegi keńestiń jańa formaty týraly baıandady.
Aqparat jáne qoǵamdyq damý mınıstri Aıda Balaeva ózi basqaratyn mınıstrliktiń aldyna jastar saıasatyna qatysty qoıylǵan strategııalyq mindetter týraly aıtty.
Atap aıtqanda, bıyl jyl sońyna deıin Memlekettik jastar saıasaty týraly zańnamaǵa ózgerister engizilip, QR Parlamentiniń qaraýyna usynylýy kerek. Onda «Jastardyń damý ındeksi», «Jastardyń áleýmettik qyzmetteri», «NEET sanatyndaǵy jastar» uǵymdary zańnamalyq turǵydan bekitilýi tıis. Sonymen birge mınıstrlik aldynda «Táýelsizdik urpaqtary» ulttyq jobasyn ázirleý mindeti tur. Munda jastardy memlekettik qoldaýdyń barlyq sharalaryn biryńǵaı qujatqa biriktirý, sondaı-aq, talantty jastardy qoldaý úshin «Táýelsizdik urpaqtary» granttaryn taǵaıyndaý jáne berý kózdelgen.
– Jastardy damytý ındeksi jastar saıasatyn iske asyrý, monıtorıng, baǵalaý tásilderin birizdendirýge jáne naqty nátıjelerge qol jetkizý úshin memlekettik, ásirese, jergilikti organdardyń jaýapkershiligin arttyrýǵa baǵyttalǵan, – dedi Aıda Balaeva.
Sondaı-aq jastar saıasatynyń jekelegen baǵyttary boıynsha keńes músheleri, «Atameken» ulttyq kásipkerler palatasy basqarma tóraǵasynyń orynbasary Oljas Ordabaev baıandama jasap, «Júzden júırik» baǵdarlamasyna kásipkerlik salasyn engizýdi usyndy.
QR Energetıka mınıstrliginiń «Iаdrolyq fızıka ınstıtýty» respýblıkalyq memlekettik kásipornynyń Nur-Sultan qalasy boıynsha fılıalynyń dırektory, fızıka-matematıka ǵylymdarynyń kandıdaty, qaýymdastyrylǵan professor Maksım Zdoroves ǵylymmen aınalysýǵa 5 jyldyq granttardy engizýdi usyndy. Bul otandyq ǵalymdar úshin uzaq merzimdi maqsattar qoıýǵa, bolashaǵy zor zertteýlerdi sapaly ári jańa deńgeıge shyǵarýǵa múmkindik beretinin aıtty.
Qazaqstan Respýblıkasy Prezıdentiniń janyndaǵy áleýmettik-ekonomıkalyq reformalardy taldaý jáne monıtorıngileý ortalyǵynyń saraptamalyq-taldaý tobynyń konsýltanty Ádil Qusmanov jastar jetistikke jetip júrgen bıznes, IT, áleýmettik-ekonomıkalyq damý jáne memlekettik basqarý salasynda jáne taǵy basqa baǵyttar boıynsha memlekettik jastar syılyǵynyń sanyn arttyrýdy usyndy.
QR Prezıdenti janyndaǵy Qazaqstan strategııalyq zertteýler ınstıtýty dırektorynyń orynbasary Sabına Sádıeva jastardy jas erekshelikteri boıynsha topqa bóle otyryp, olarmen maqsatty túrde jumys jasaý qajettigin atap ótti.
Otyrys qorytyndysy boıynsha Keńes tóraǵasy Dáýren Abaev birqatar naqty tapsyrma berdi.
– Memlekettik qoldaýdyń barlyq sharasy jastar úshin tıimdi, elge paıdaly jobalar jasaýǵa baǵyttalýy tıis. Ol jastardyń kásibı baǵdar alýyna, mamandyqty durys tańdaýyna, óz densaýlyǵy úshin jaýapty bolýyna, tulǵa retinde qalyptasýyna, ómir ótkelderinde durys táýekel etip, súrinip ketpeýine jol ashýy kerek, – dedi Dáýren Abaev.
Esterińizge sala keteıik, Qazaqstan Respýblıkasy Prezıdentiniń janyndaǵy Jastar saıasaty jónindegi keńes – elimizdegi memlekettik jastar saıasatyn jetildirý jónindegi sharalardy ázirleý jónindegi basty dıalog alańy. Bıyl Memleket basshysynyń Jarlyǵymen Keńes quramy tolyǵymen jańartyldy. Oǵan Prezıdenttik jastar kadr rezervi men Ulttyq qoǵamdyq senim keńesiniń ókilderi, respýblıkalyq jastar uıymdarynyń basshylary, depýtattar, sarapshylar kirdi.