Qazaqstan Respýblıkasynyń Ishki ister mınıstri, polısııa general-leıtenanty Erlan Turǵymbaev Almatyǵa jumys sapary barysynda shahardyń jalpy bilim berý mekemelerine júrgizilgen taldaýdyń nátıjelerimen tanysty, dep habarlaıdy Egemen.kz Polisia.kz saıtyna silteme jasap.
Buǵan deıin Ishki ister mınıstrliginiń basshysy bilim berý uıymdaryndaǵy oqýshylardyń qaýipsizdigin qamtamasyz etý jónindegi jedel keńeste ishki ister organdarynyń jáne aýmaqtyq polısııa departamentteriniń basshylaryna barlyq oqý oryndaryn beınebaqylaý júıeleri, qyzmetkerlerdi jáne kelýshilerdi eskertý quraldary, kúzettik dabyl jáne fızıkalyq kúzeti bar-joǵyn tekserýdi tapsyrǵan.
– Balalar – qoǵamnyń eń osal bóligi. Sondyqtan olardyń qaýipsizdigi árqashan basty nazarda. Jergilikti atqarýshy organdarmen, bilim berý uıymdarymen jáne azamattarmen birlesip, biz balalardyń mektepterde bilim alýy úshin barlyq qajetti sharalardy qabyldaýymyz kerek, al ata-analar olardyń qaýipsizdigi úshin alańdamaýy kerek, – dedi Erlan Turǵymbaev.
Taldaýdyń aralyq nátıjeleri týraly esep bere otyryp, Almaty qalalyq PD basshysy Qanat Taımerdenov, tapsyrmalar sheńberinde bilim basqarmasymen birlese otyryp, shuǵyl túrde komıssııa qurylyp, qalanyń barlyq mektepterinde zertteý júrgizilgenin jáne birqatar nysandarda beınebaqylaý kameralarynyń jetispeýshiligi, doǵaly metall detektorlarynyń, dabyl batyrmalarynyń bolmaýy, sondaı-aq, mamandandyrylǵan kúzet boıynsha jetispeýshilikter bar ekenin atap ótti.
– Taldaý nátıjeleri boıynsha barlyq kemshilikterdi joıý Jospary quryldy. Oqý oryndarynda ornatylǵan barlyq beınekameralar polısııa Departamentiniń Jedel basqarý Ortalyǵyna qosylady. Dúrbeleń batyrmasyn basqannan keıin baqylaý kameralarynan túsirilgen beıneler jedel basqarý Ortalyǵynda avtomatty túrde kórsetiletin qarý-jaraq dúkenderiniń úlgisindeı. Sodan keıin oqıǵa ornyna polısııa men kúzet kompanııasy keledi. Keıinnen qalanyń lańkestikke osal sanatyna jatatyn barlyq nysandary biryńǵaı jedel basqarý ortalyǵyna qosylady, – dep túıindedi Qanat Taımerdenov.