Balalar lageri daıyndyqqa kiristi

– Oqýshylardyń jazǵy demalysyn uıymdastyrýǵa daıyndyq  jumystary jú­rip jatyr. Oblysta qala syrtyna ornalasqan 10 shaq­ty balalar lageri bar. Olar qazir demalys ornynyń aýmaǵyn tazar­typ, mańaıyndaǵy sý qoı­malarynyń jaǵalaý­laryn jónge keltirýde. Qazir ba­lalardyń jazǵy demaly­syn uıymdastyratyn me­ke­me­lerdiń bári mem­leket­tik satyp alýǵa qaty­syp, sanıtarlyq-epı­demııalyq­ ruqsat alý jumys­ta­ryn júr­gizip jatyr, – dedi ob­lystyq bilim bas­qarma­sy­nyń baspasóz hatshysy Anna Lazareva. 

Túptep kelgende, ba­lalarǵa arnalǵan saýyq­tyrý lagerleriniń jumys isteý, istemeýi óńirdegi epı­­­demııalyq jaǵdaıǵa baı­lanysty bolaıyn dep tur. Naqty qaı demalys ornynyń qalaı jumys isteıtinin óńirlik jedel shtab sheshedi. A.La­za­reva­nyń sózinshe, aldaǵy aı­da ınternat me­kemeleri men erekshe bilim berý qa­jettiligi bar balalar úshin 4 demalys orny ashylady. Bular – «Altyngúl», «Lesnaıa skazka», «Bolashaq» jáne Bákirov atyndaǵy lagerler. Bul saýyqtyrý oryndarynda bir aýysym­nyń ózinde 640-tan astam bala demalatyn bolady.

Al qatardaǵy mektep oqýshy­lary qalǵan 6 lagerde demalady. Biraq olar jumysqa kirispes bu­ryn belgili bir talaptar­dy oryndaýy shart. My­sa­ly, mundaı demalys oryn­darynyń bi­rine shamamen eki júzdeı bala syıatyn bolsa, lager mekemesi sonyń jartysyn ǵana qabyldaýy tıis. Sondaı-aq lagerge jazǵy demalysyn ótkizý úshin kelgen ár balanyń densaýlyq jaǵdaıy týraly qujaty, juqpaly aýrýy barlarmen, sonyń ishinde COVID-19 juqtyrǵandarmen baılanysta bolmaǵanyn rastaıtyn anyq­tamasy bolýy kerek. Eń bastysy, jaz­ǵy lagerde demalǵysy ke­letin balǵyndarda zertha­nadan «taldaý nátıjesi ko­ronavırýsqa teris nátı­je kórsetti» degen zert­ha­nalyq qujaty bolýy shart. Bul qujattyń merzimi 72 sa­ǵat­tan asyp ketse, jaramsyz bolyp qalady. 

Al mektep janyndaǵy dema­lys oryndarynyń bıyl ju­mys isteý-istemeýi ekitalaı.  Bi­lim bas­qar­masyndaǵylar bul­ máse­leniń taıaý kúnderi sheshi­letinin aıtty.