Túrkistan oblysynda 11 nesıe alýshyny aldaǵan bank qyzmetkeri úsh jyl úsh aıǵa sottaldy, dep habarlaıdy Egemen.kz Polisia.kz saıtyna silteme jasap.
Túlkibas aýdandyq polısııa bólimine birneshe jergilikti turǵyn aryzdanyp, nesıelerin ótep bolǵannan keıin de qaıtadan qaryz bolyp shyqqandaryn aıtqan. Atalǵan jaıtty polısııa qyzmetkerleri birden QR Qylmystyq kodeksiniń 190-baby (Alaıaqtyq) boıynsha SDTBT-ǵa tirkegen.
Túlkibas APB-niń qyzmetkerleri jedel izdestirý is-sharalaryn júrgizip, nátıjesinde kúdikti retinde Shymkent qalasynyń turǵynyn jáne burynǵy bank qyzmetkerin ustaǵan. Jedel sharalardy atqarǵan polısııa qyzmetkerleri qylmystyq isti tolyǵymen ashyp, kinálini quryqtaý úshin eki aı boıy is-sharalardy joǵary deńgeıde atqarady.
Sotqa deıingi tergep-tekserý barysynda Túlkibas APB-niń tergeýshisi kúdiktiniń 2018-2019 jyldar aralyǵynda aýdandaǵy belgili bir banktyń fılıalynda menedjer bolyp qyzmet atqaryp, nesıe alýǵa kelgen turǵyndarǵa nesıe rásimdeý kezinde alaıaqtyq jasaǵanyn anyqtady. Iаǵnı kúdikti jigit zań aıasynda nesıe alý úshin túziletin bir kelisimsharttyń ornyna ekeýin qoldan jasap, birinde turǵynǵa arnalǵan somany, al ekinshisinde turǵynnyń alatyn nesıesiniń ústinen ózine kerekti qarjyny qosyp kórsetip, óziniń aılasyn iske asyrǵan.
Bul jaıtty turǵyndar nesıelerin tólep bitken sátte bilgen. Sebebi bankten nesıeniń áli jabylmaǵandyǵy týraly habarlama kelgen. Polıseılerdiń qyraǵylyǵynyń arqasynda alaıaqtyq jasaǵan bank qyzmetkeriniń jalpy 11 turǵyndy osylaı aldaǵany, shyǵyn kólemi segiz mıllıon teńgege jýyq somany quraǵany rastaldy.
Osylaısha qylmystyq is aýdandyq sotqa joldanyp, sot úkimimen 30 jastaǵy er azamat úsh jyl úsh aıǵa bas bostandyǵynan aıyryldy.