Elimizde 18 dinı baǵytta 3 848 birlestik resmı tirkelgen. Aqparat jáne qoǵamdyq damý mınıstrligi óz quzyreti sheginde olardyń árbirimen tyǵyz jumys istep keledi. Bul týraly mınıstr Aıda Balaeva halyq aldyndaǵy esep berý kezdesýinde aıtty, dep habarlaıdy Egemen.kz.
«Mınıstrlik negizgi úsh baǵyt boıynsha jumys júrgizip jatyr. Birinshi – ınternettegi dinı ekstremızm ıdeologııasyna qarsy kúres, ekinshi – naqty maqsatty toptarmen aqparattyq-túsindirý júrgizý, úshinshi – jat dinı aǵym qurbandaryn ońaltý jumystary», dedi Aqparat jáne qoǵamdyq damý mınıstri Aıda Balaeva.
Onyń aıtýynsha, radıkaldy dinı aǵymdar ıdeologııasy negizinen ınternet resýrstar arqyly taralady. Bul rette, ekstremıstik dinı aqparattyń aldyn alý maqsatynda ınternet jelilerine udaıy monıtorıng júrgiziledi. Byltyr osyndaı 73 000 destrýktıvti materıal buǵattalyp, BAQ pen áleýmettik jeliler arqyly 80 000-nan astam dinı aǵartý jumystary jarııalandy.
Halyqqa sapaly dinı aqparat berý maqsatynda búginde 229 túsindirý-nasıhat toby bar. Joǵary saýatty, kásibı sarapshylardan turatyn úgit-nasıhat toby 1,5 mıllıon halyqty qamtyǵan 16000-nan astam naqty aǵartý sharalaryn júrgizdi. Ásirese radıkaldy dinı aǵymdar yqpalyna túsý qaýpi joǵary naqty maqsatty toptarmen jumysqa basa mán berildi», dedi mınıstr A. Balaeva.