Shymkent qalasy epıdemıologııalyq ahýal boıynsha «jasyl» aımaqqa ótti. Bul týraly Shymkent qalasynyń densaýlyq saqtaý basqarmasynyń basshysy Baqytjan Pozılov qala ákimdiginiń «Instagram» jáne Facebook paraqshasynda ótken tikeleı efırde málimdedi, dep habarlaıdy Egemen.kz.
Basqarma basshysy aldymen epıdemıologııalyq jaǵdaıdan habardar etip, turǵyndar saýalyna jaýap berdi. Efır barysynda turǵyndar negizinen vaksınalaý, dári-dármek alý jóninde saýaldaryn joldap, tolyqqandy jaýap aldy.
Bir saǵatqa sozylǵan tikeleı efır kezinde B. Pozılov vaksınalaý jumystaryna erekshe toqtalyp, qalypty ómirge oralý úshin profılaktıkalyq sharalardyń mańyzdylyǵyn atap ótti.
– О́tken táýlikte COVID-19 ınfeksııasyn juqtyrǵan 62 jaǵdaı tirkeldi. Qaladaǵy epıdemııalyq jaǵdaı turaqtalyp keledi. Búgin qala «jasyl» aımaqqa ótti. Jaǵdaıdyń turaqtalýyna ekpe egý jumystarynyń qarqyndy júrgizilýi sebep boldy. Shymkent elimiz boıynsha vaksınasııalaýda alǵashqy úshtikte ornalasqan. Qalada 43 vaksınalaý pýnkti bar, – dedi B. Pozılov.
Aıta ketsek, ótken táýlikte óńir boıynsha 2 016 adam vaksına saldyrdy: I komponent – 858, II komponent – 1158. Egý naýqany bastalǵaly barlyǵy 171 468 adam vaksınalandy. Onyń ishinde 77 515 adam vaksınanyń eki komponentin alǵan.