«Chelsıdiń» chempıondyq quramy qazir qaıda júr?

Pep Gvardıolla jattyqtyratyn klýb óz tarıhynda tuńǵysh ret bul mártebeli týrnırdiń fınalısi atanyp otyrsa, «Chelsı» ekinshi márte chempıon ataný múmkindigine ıe. Londondyq ujym alǵash ret fınalǵa 2008 jyly shyǵyp, jeńe almady. Ekinshi ret 2012 jyly shyǵyp, dramaǵa toly matchta mıýnhendik «Bavarııadan» basym tústi. Sol jolǵy jeńimpaz «Chelsı» oıynshylary qazir qaıda? Sol kezdegi quramnan klýbta kim qaldy? Osy suraqtarǵa jaýap izdeıik.Qaqpany qorǵaǵan Petr Cheh ol kezde 30 jasta bolatyn. Qazir 39-da. Fýt­boldan áli alystaǵan joq. «Chel­sıdiń» 23 jasqa deıingi jastar komandasynda oı­naıdy.

Joze Bozıngva. Portýgalııa fýtbol­shysy ol kezde 30 jasta edi. Qazir 39-da. 2012 jyly klýbtan ketip, 2012-2013 jyl­dary «Kýınz Park Reındjers» ko­man­­dasynda, 2013-2016 jyldary «Trabzonsporda» oınady. Odan keıin fýt­bol­shy týraly eshqandaı aqparat jarııa­lanǵan joq.

Chempıondar lıgasynda jeńgen kezde 25 jasta bolǵan qorǵaýshy Davıd Lýız qazir Londonnyń «Arsenalynyń» namysyn qorǵap júr.

Garı Kehıll. Qos qulaqty kýbokty jeńgen kezde 27 jasta edi. Qazir 36-da. «Chelsıde» 2012-2019 jyldar araly­ǵyn­da oınap, klýbtyń ańyzyna aınaldy. 2019 jyly «Krıstal Pelaspen» keli­simshartqa otyrdy.

Eshlı Koýl. 41 jastaǵy eks-qorǵaýshy 2014 jyly klýbtan ketken soń «Roma», «Los-Andjeles Gelaksı», «Derbı Kaýn­tı» komandalarynyń namysyn qorǵady. 2019 jyldyń jazynda mansabyn aıaq­taǵanyn málimdedi.

Djon Obı Mıkel. 2020 jyldyń 17 tamyzynda «Chelsıden» erkin agent re­tinde ketip, «Stok Sıtı» klýbymen kelisim­shartqa otyrdy.

Frenk Lempard. «Chelsı» tarıhyndaǵy eń úzdik bombardır (211 gol). «Chelsıden» ketkennen keıin bir-bir maýsymnan «Man­chester Sıtı», «Nıý Iork Sıtı» klýbtarynda oınady. 2019-2021 jyldary «Chelsıdiń» bas bapkeri bolyp jumys istedi. Alaıda bapker retindegi nátıjesi basshylyqqa unamaı, onyń ornyna nemis mamany Tomas Týhel keldi.

Salomon Kalý. ChL-dy jeńip alǵan soń ile-shala klýbtan ketken oıynshylardyń biri. Odan soń «Lıll», «Gerta» komandalarynda oınady. Qazir brazılııalyq «Botofago» oıynshysy. 25 oıynda 1 gol soqqan.

Hýan Mata. «Chelsı» sapynda erekshe ma­ńyzǵa ıe bola almaǵan fýtbolshy 2014 jyldan beri «Manchester Iýnaıted» sapynda oınap júr.

Raıan Bertrand. Aǵylshyn oıynshysy ChL-dy utqan jyly 23-te boldy. Qazir 32 jasta. 2014 jyly «Aston Vılla» sapyna aýysty. 2015 jyly aq­pan­nan bastap «Saýtgempton» oıynshysy atandy.

Dıde Drogba. 34 jasynda «Chelsımen» birge Chempıondar lıgasyn jeńip alǵan ıvýarlyq ańyz fýtbolshy «Chelsıden» keıin Kanadanyń «Monreal Impakt», Amerıkanyń «Fınıks Raızıng» komandalaryna bardy. 40 jasynda karerasyn aıaqtady. Qazir «Fınıks Raızıng» klýbynyń ıesi.

Paýlý Ferreıra. 2013 jyly «Chelsı» sapyndaǵy sońǵy maýsymyn ótkizip, kásibı karerasyn aıaqtady.

Maıkl Essen. Otyzynda orda bu­zyp ChL-dy jeńip aldy. Qazir 39 jasta. 2005-2014 jyldar aralyǵynda «Chel­sıde» 168 kezdesýge qatysyp, 17 gol soqqan. Bul aralyqta «Realda» da oınap keldi. Keıin «Mılanǵa», grekııalyq «Pana­tınaıkosqa», «Persıb Bandýng» komandalaryna aýys­ty. Kásibı mansabyn ázerbaıjandyq «Sabaıl» klýbynda támamdady.

Orıol Romeý. Ispan fýtbolshysy ChL-dy utqan kezde 21-de edi. Qazir 30-da. Kelesheginen kóp úmit kúttirgen jartylaı qorǵaýshynyń keıingi taǵdyry top-klýbtarmen baılanysty bolǵan joq. «Chelsıde» ótkizgen tórt maýsymnan keıin «Va­lensııa», «Shtýtgart» klýbtaryna bardy. 2015 jyly «Saýtgemptonmen» úsh jyldyq kelisimge otyrdy. Aǵylshyn chempıonatynda oınaǵanyna qaramastan, sol kúıi Ispanııa ulttyq quramasyna iline almady.

Floran Malýda. 2006 jyly Fransııa quramasymen álem chempıony atanǵan ol «Chelsıge» kele salysymen Aren Rob­bendi negizgi quramnan yǵystyrdy. Osy­­ǵan qarap onyń qanshalyqty berik oı­ynshy ekenin ańǵarýǵa bolady. 2013 jyly «Trabzonsporǵa» aýys­ty. Túrik klýbyndaǵy mansaby uzaqqa sozyl­­­maı, 2018 jyly Lıýksembýrgtiń «Dıfferdanj» komandasynyń sapyna ketti.

Denıel Starrıdj. Anglııanyń asa kóp úmit kútken fýtbolshysy. Eń juldyzdy sáti «Lıverpýlde» ótti. 116 oıynda 51 gol soqty. Odan soń «Vest Bromvıchke», «Trabzonsporǵa» aýysty. Qazir eshqandaı klýb sapynda emes.

Fernando Torres. 2011-2015 jyldar aralyǵynda londondyq ujymda oınap, 2018-2019 jyldarda Japonııanyń «Sagan Tosý» sapyna aýysty. 2021 jyldan bas­tap «Atletıko Madrıd B» komandasyn jattyqtyrady.

Roberto Dı Matteo. 42 jasynda bas bapker retinde ChL-dy utqan ol kez kel­­gen bapker armandaıtyn osy bir baqyt­ty sátke kezdeısoq qol jetkizdi. 2011 jyly bas bapker Andre Vıllash-Boash­tyń kómekshisi bolyp jumysqa tur­ǵan. Alaıda kóp uzamaı Vıllash-Boash qyzmet­ten ketip, Dı Matteo komandany ýaqyt­sha qolǵa alady. 2012 jyly 5 mamyrda Anglııa kýbogyn, eki apta ótken soń Chempıondar lıgasyn jeńip aldy. Qara­shada klýb basshylyǵy Dı Matteony ju­mystan bosatty. Odan keıin «Shalke», «As­ton Vılla» klýbtaryn jattyqtyrdy. Bi­raq aıtarlyqtaı jetistikke jete almady.

Fınal jaıly birer sóz. 2020/2021 jylǵy Chempıondar lıgasynyń fınaly 29 mamyr kúni Portýgalııadaǵy «Dra­gaý» stadıonynda ótedi. Fınalǵa ıspan tóreshisi Antonıo Mateý Laos qazylyq jasaıdy. Matchty stadıonnan ár komandadan 6 myń jankúıer ǵana kelip, tamashalaı alady. Aıtpaqshy, 2012 jylǵy jeńimpaz quramnan dál qazir «Chelsı» sapynda eshkim joq. Tek Andreas Krıstensendi aıtýǵa bolady. Ol 2012 jyly aqpan aıynda klýbpen kelisimshartqa otyrdy. Biraq bas bapker Vıllash-Boashtyń senimine ıe bola alǵan joq. Bas komandadaǵy resmı matchyn tek 2014 jyly ǵana ótkizdi.