Áýeli Úndistanda ótedi dep bekitilip, keıinnen eldegi epıdemııalyq jaǵdaıdyń nasharlyǵyna baılanysty Birikken Arab Ámirlikteriniń Dýbaı qalasyna aýystyrylǵan bokstan eresekter arasyndaǵy Azııa chempıonaty qazaqstandyq bylǵary qolǵap sheberleri úshin sátti bastala qoıǵan joq.
Burynǵy sary qurlyq básekelerinde keı salmaqtaǵy boksshylar shırek fınal, jartylaı fınal básekelerine deıin jetip súrinetin bolsa, bıylǵy birinshilikte «á» degennen-aq eki jerlesimiz alǵashqy jekpe-jekterinde qarsylastarynan jeńilip qaldy. Onyń sebebi de joq emes.
Máselen, jarystyń alǵashqy kúninde qarsylastarynan jeńilip qalǵan eki jerlesimiz bıylǵy Azııa chempıonatyna ózderiniń ádettegi salmaǵynda emes, bir saty joǵary salmaqta judyryqtasty. Atap aıtar bolsaq, byltyr el chempıonatynda 52 kıloda top jarǵan Sabyrhan Mahmut sary qurlyq básekesine 56 kıloda bardy. Al Tokıo Olımpıadasyna 57 kılo salmaqta joldama jeńip alǵan Serik Temirjanov Dýbaı sharshy alańynda 60 kıloda óner kórsetti.
Sabyrhan alǵashqy aınalymda Úndistan ókili Mohammad Hýssam Ýddınmen kezdesti. Eki boksshy rıngke kóterilgen sátte-aq Mohammadtyń otandasymyzdan ájeptáýir iri ekeni, al Mahmuttyń dene bitimi 56 kıloǵa saı kelmeıtini birden baıqaldy. Onyń ústine úndi boksshysynyń boıy da, qoly da Sabyrhanǵa qaraǵanda uzyn edi. Bul – boksta úlken ról atqaratynyn jankúıerler jaqsy biledi. Otandasymyz óziniń óte shapshań qımyldaıtynynyń arqasynda úndistandyq boksshynyń biraz soqqysyn ózine darytqan joq. Degenmen jeńil salmaqtyń ókili bolǵan soń Mohammad Sabyrhannyń soqqylaryn shybyn shaqqan qurly kórmedi. Sóıtip úsh raýnd boıy belsendi qımyldap, biraq dóp soqqylarynyń azdyǵyna baılanysty jerlesimiz óziniń alǵashqy Azııa chempıonatyn birinshi aınalymnan aıaqtaýǵa májbúr boldy. Qorytyndy esep – 5:0, jeńis úndistandyq sportshyǵa berildi.
Al Serik Temirjanov Tokıo Olımpıadasynda 63 kıloda baq synaıtyn ırandyq Danııal Shahbahshydan teń dárejede ótken jekpe-jekte 2:3 esebimen jeńilip qaldy. Temirjanovtyń da bul salmaqta «bóten» ekeni birden baıqaldy.
Olımpııa oıyndarynda 63 kıloda el namysyn qorǵaıtyn quramanyń eń tájirıbeli ári egde jastaǵy boksshysy Zákir Safıýllın alǵashqy aınalymda Iran ókili Ashkan Rezaıdy qapy qaldyryp, jarysty sátti bastaǵanymen, shırek fınalda Azııa qurlyǵynyń ekinshi nómirli boksshysy mońǵolııalyq Chınzorıg Baatarsýhten (1:4) utylyp qaldy. Otandasymyzdyń buǵan deıingi jarystardaǵy súreńsiz óneri onsyz da jankúıerler kóńilinen shyqpaı júr edi. Azııa chempıonatyndaǵy jeńilis bul jaǵdaıdy odan ári ýshyqtyryp jiberdi. Endi Zákir Olımpııa oıyndarynda júldege iligip, jankúıerlerdiń renishin jýyp-shaıýy kerek.
Qalǵan 7 salmaqtaǵy otandastarymyzdan Danıal Sábıt (49 kg), Ábilhan Amanqul (75 kg) jáne Vasılıı Levıt (91 kg) Azııa birinshiligin sátti bastady. Al Sáken Bıbosynov (52 kg), Abylaıhan Júsipov (69 kg), Bekzat Nurdáýletov (81 kg), qurama kapıtany Qamshybek Qońqabaev (+91 kg) alǵashqy jekpe-jekterin keshe keshkisin ótkizdi.
Eń jeńil salmaqta Azııa chempıonatyna alǵash ret qatysyp jatqan Danıal Sábıt birinshi aınalymda Indonezııa ókili Kornelıýs Kvangý Langýdi óte senimdi jeńdi – 5:0. Bir jekpe-jekpen jartylaı fınalǵa shyqqan Sábıt kem degende qola júldeni naqtylap qoıdy. Otandasymyz fınalǵa shyǵý úshin kýveıttik qarsylasyn tehnıkalyq nokdaýnmen jeńgen fılıppındik Mark Lester Dýranspen judyryqtasady.
75 kılodaǵy Ábilhan Amanqul jekpe-jeksiz kelesi aınalymǵa joldama aldy. Ol alǵashqy irikteý kezeńinde kýveıttik Saıd Salbrahanımen kezdesýi kerek bolatyn, alaıda qarsylasy sharshy alańǵa shyǵýdan bas tartty. Jerlesimiz keshe jarystyń shırek fınalynda 2019 jyly Taılandta ótken Azııa chempıonatynda otandasymyz Tursynbaı Qulahmetten jeńilip, kúmis júldeger atanǵan úndistandyq Ashısh Kýmarmen jartylaı fınal joldamasyn sarapqa saldy.
91 kılo salmaqta jarys favorıti sanalǵan qazaqstandyq Vasılıı Levıt shırek fınalda ırandyq Ehsan Rýzbahanıdi 4:1 upaıymen jeńip, jartylaı fınalǵa joldama aldy. Bul – Levıttiń enshisinde de qola júlde bar degen sóz. Rýzbahanıdiń esimi qazaq jankúıerlerine jaqsy tanys. 30 jastaǵy boksshy bir jyldary WSB jobasynda baq synaǵan qazaqstandyq «Astana Arlans» klýbynda judyryqtasqan edi. Sondaı-aq ol 2012 jylǵy London Olımpıadasynyń shırek fınalynda Ádilbek Nııazymbetovten 13:10 esebimen jeńilip, qolda turǵan qola júldeden qaǵylǵan bolatyn.