Aıagóz qalasynyń burynǵy ákimi 4 jyl 5 aıǵa bas bostandyǵynan aıyryldy, dep habarlaıdy Egemen.kz.
Eks-ákim Qýanysh Azyhanovqa para aldy degen aıyp taǵyldy. Aıagóz aýdandyq sotynyń málimetinshe, 2020 jyldyń 16 jáne 17 qyrkúıeginde qala basshysy «Kórkem» JK merdiger uıymynan oryndalǵan jumystar aktisine qol qoıǵany úshin 1 mıllıon 200 myń teńge kóleminde para alǵan. Merdiger tabıǵı apat saldarynan zardap shekken turǵyn úılerdi qalpyna keltirýmen aınalysqan.
Qala basshysy qyzmettik kabınetinde ustalǵan bolatyn. Alaıda burynǵy ákim aqshany qaryzǵa alǵanyn aıtyp, kinásin moıyndamaǵan.
«Sottalýshynyń kinásin kýágerlerdiń aıǵaqtary, jasyryn tergeý áreketteriniń nátıjesi, áńgime stenogrammalary men beınejazbalar jáne zattaı aıǵaqtar rastady. Kýáger sottalýshy aqshany qaryzǵa aldy degendi teriske shyǵardy. Ol oryndalǵan jumystardyń aktilerine qol qoıý úshin aqsha bergenin rastady. QR Qylmystyq kodeksiniń 366-baby, 2-bóliginiń sanksııasy 3 jyldan 7 jylǵa deıingi merzimge bas bostandyǵynan aıyrý túrindegi jazany kózdeıdi. Sot qylmystyq jaýaptylyqty jeńildetetin mán-jaılardy anyqtaǵan joq», dedi sot ókilderi.
Aıta keteıik, tergeý 9 aıǵa sozyldy. Osy ýaqyt ishinde is boıynsha úsh sýdıa aýysqan. Sondaı-aq derekterdi burmalaǵany úshin sybaılas jemqorlyqqa qarsy qyzmettiń tergeýshileri jaýapqa tartylǵan.
Prokýror sýdıadan burynǵy basshyny 5 jylǵa bas bostandyǵynan aıyrýdy surady. Biraq sot barlyq jaǵdaı negizinde aıyptalýshyny memlekettik qyzmette jumys isteý quqyǵynan ómir boıyna aıyra otyryp, 4 jyl 5 aı merzimge bas bostandynan aıyrý jazasyn taǵaıyndady. Úkim áli zańdy kúshine engen joq.