Respýblıkanyń birqatar aımaqtaryndaǵy fermerler kóktemgi egin egý jumystaryn aıaqtaýǵa jaqyn. Bul týraly Ortalyq kommýnıkasııalar qyzmetinde ótken brıfıngte Aýyl sharýashylyǵy birinshi vıse-mınıstri Aıdarbek Saparov málimdedi, dep jazady Egemen.kz.
Onyń aıtýynsha, bıyl kóktemgi dala jumystary shtattyq rejımde jáne tıimdi merzimde júrgizilýde. Fermerler ylǵaldy jabý, egis alqaptaryn óńdeý jáne kóktemgi jer jyrtý jumystaryn ýaqtyly atqardy.
«Qazirgi ýaqytta kóktemgi dala jumystary respýblıkanyń barlyq óńirlerinde júrgizilýde. Atap aıtqanda, búgingi kúni jalpy egis alańynan 16,7 mln ga nemese 88,5% egildi, bul ótken jyldan 1,5 mln gektarǵa artyq. Sonyń ishinde: dándi daqyldar - 13,1 mln ga (87,2%), maıly daqyldar 2,7 mln ga (93,6%), 1 mln ga (92%) basqa da daqyldar sebildi», dedi A.Saparov.
Negizgi astyq egetin oblystar mamyr aıynyń ortasynan bastap egis naýqanyna kiristi, bul rette Aqtóbe, Mańǵystaý jáne Jambyl oblystarynda egis jumystary aıaqtaldy. Almaty, Túrkistan jáne Qyzylorda oblystarynda aıaqtalý satysynda.
Bıyl 22,8 mln gektarǵa aýyl sharýashylyǵy daqyldary egiledi. Egis alqaptarynyń qurylymyn qalyptastyrý kezinde ákimdikterge áleýmettik mańyzy bar daqyldardyń egis alqaptaryn keńeıtýge nazar aýdarý usynylǵan bolatyn. Bul qatarda kartop, qaraqumyq, qant qyzylshasy, maıly jáne jem-shóp daqyldary bar.
Oblys ákimdikteriniń derekteri boıynsha egin egý jumystaryn 3 maýsymǵa deıin aıaqtaý josparlanyp otyr. Bıyl kóktemgi egin egý jumystaryna 128 mlrd teńge qarjy jumsaldy.