Importtalǵan tuqymdardan sábiz ben baldyrkóktiń barlyq daqyldaryn joıyp jibere alatyn bakterııa anyqtaldy, dep habarlaıdy Egemen.kz AShM baspasóz qyzmetine silteme jasap.
Bıyl sáýir aıynan mamyr aıyna deıin Qazaqstanǵa Germanııa, Nıderlandy jáne Fransııa elderinen jetkizilýi tıis 228 tonna tuqymdyq kartopty, 46,4 keli fransýzdyq sábiz tuqymyn teksergende QR Aýyl sharýashylyǵy mınıstrliginiń Agroónerkásip keshenindegi memlekettik ınspeksııa komıtetiniń mamandary kartop tuqymynan (zebra chıpi) zııandy qozdyrǵysh bakterııasyn anyqtady.
Candidatus Liberibacter Solanacearum bakterııasy ISO 17025 halyqaralyq standartyna sáıkes akkredıttelgen «О́simdikter karantıni respýblıkalyq ortalyǵy» MM Almaty aımaqtyq karantındik zerthanasynyń saraptama qorytyndysy arqyly rastalǵan.
Zertteýler adamı faktor áser ete almaıtyn jáne jalǵan oń nátıje kórsetý múmkindigin boldyrmaıtyn sertıfıkattalǵan test-jıyntyqtar qoldanylyp, PTR taldaýǵa arnalǵan joǵary sezimtal deteksııalaý jabdyǵymen júrgizildi.
Candidatus Liberibacter Solanacearum Qazaqstan Respýblıkasynyń aýmaǵyna joǵary fıtosanıtarlyq qaýip tóndiredi. Zebra chıpi kartopqa, qyzanaqqa, sábiz ben baldyrkókke jáne basqa da daqyldarǵa keri áser etedi. Bakterııalar respýblıka aýmaǵyna taralatyn bolsa, ónimdi túgeldeı joıyp jiberýi múmkin jáne eldiń azyq-túlik qaýipsizdigine nuqsan keltiredi.
Juqpaly bakterııasy bar tuqym faktileri boıynsha tıisti karantındik qujattar resimdeldi. Ákimshilik quqyq buzýshylyq týraly Qazaqstan Respýblıkasynyń kodeksine sáıkes materıaldar sottyń qaraýyna jiberildi. Onyń sheshiminiń nátıjeleri boıynsha tıisti sharalar qabyldanatyn bolady.