Jaqyn tartqan adamnyń qushaǵy ottaı ystyq. Keıde adam jaqynyna degen mahabbaty men qurmetin sol jyp-jyly qushaǵy arqyly jetkizedi. Odan júreginen meıirim ańqyp turǵan jannyń jylýyn sezinesiń. Sezinip qana qoımaı, sol qushaqta kóńiliń balqıdy. Bul ómirde saǵan qol sozyp, qushaq jaıǵan jan bolsa, onda seniń álemiń meıirimge toly.
Bizdi osyndaı bir asqaq oıǵa jetelegen belgili sýretshi Abdýahat Muratbaevtyń sımvolızm stılinde oryndalǵan «Qushaq» atty týyndysy. Sheberdiń keskindemesinde ulttyń uzaq jyldar boıy saqtalyp kele jatqan dańqty dástúri bar. Kartınada adamnyń bir-birine degen sheksiz iltıpaty uıalaǵan.
Jalpy, sımvolızm – sýretshi kartınany salǵan kezinde jasyryn arnaýdy, allegorııany tipti fılosofııalyq tereń nemese mıstıkalyq mándi shıfrlardy paıdalanatyn beıneleý ónerindegi stıl men baǵyt. Týyndylardaǵy qupııa tańbalar shynaıy jáne tylsym dúnıeler arasyndaǵy baılanystardy naqty kórsetedi. Olar kórermendi qumarlyqpen oılanýǵa, sıýjetti qaradúrsin qabyldaýdan bas tartýǵa jáne avtor oıynyń naǵyz mánin tabýǵa ıtermeleıdi. Sımvolızm álemdik ónerge zor áserin tıgizip, HH ǵasyrdaǵy keskindemeniń kóptegen jańa baǵyty úshin bastamashy boldy.
Keregeniń aıasynda qushaqtasyp turǵan erkek pen áıeldiń fıgýrasy keneptiń betin tutastaı alyp jatyr. Fıgýralar bezendirilgen, erkektiń fıgýrasy kórermenge arqasymen salynǵan jáne quraq kórpeshe sekildi elementterden quralǵan plashpen tutastaı jabylǵan. Bul aqparat jasyrylǵan mozaıka sııaqty kórinedi. Oǵan Almaty oblysynyń Tamǵaly shatqalyndaǵy jartasqa salynǵan petroglıfter beınelengen. Erkektiń fıgýrasynyń artyndaǵy áıeldiń fıgýrasy jarym-jartylaı ǵana kórinedi. Ol basyn jigittiń ıyǵyna súıegen. Uzyn shashtary arqasyna tógilgen. Ol óziniń erin meıirimmen qushaqtap tur.
Týyndy tutastaı táńirshildik sımvoldarymen bezendirilgen. Túrki sımvolıkasynda úshburysh úı, oshaq pen áıel negizi degen mán beredi. Bul Umaıdyń, Qudaı-Ananyń, qunarlylyqtyń belgisi. Tikburyshpen qıylysatyn sheńber – sáýleli belgi, Máńgilik Aspandy sıpattaıtyn Kúnniń tańbasy, sol sııaqty shańyraqty da bildiredi.
Sýretshi óz týyndysynda adamzatqa tán máńgilik qundylyqtardy shıfrlaǵan – bul mahabbat, otbasy, bala, úı, erkindik, rýhanııat jáne din.