«7-20-25» turǵyn úı baǵdarlamasy boıynsha 60 myńnan astam ótinish kelip túsken. Osynshama ótinishtiń quny 727,4 mlrd teńgeni quraıdy eken. Árıne, munyń bári birdeı qabyldanbasy belgili.
Ulttyq bank taratqan aqparat boıynsha, bıyl 27 mamyrda tirkelgen 60 398 ótinishtiń 35 280-i ǵana maquldanǵan. Iаǵnı kelip túsken ótinishtiń teń jartysy ǵana talapqa saı bolǵan. Endi osy maqsatqa 426,6 mlrd teńge bólinbek. Buǵan deıin baǵdarlama aıasynda 325 mlrd teńgege nesıe berilgeni habarlanǵan bolatyn.
Eske salsaq, jaqynda ǵana Qarjy naryǵyn retteý jáne damytý agenttiginiń basshysy Mádına Ábilqasymova «7-20-25» jáne «Baspana hıt» baǵdarlamalarynyń jabylatynyn aıtqan edi.
«Daǵdarystyń ekonomıkaǵa áserin tómendetý úshin naryqtyq ustanymdarǵa oryn bere otyryp memlekettiń nesıeleý baǵdarlamalarynan birtindep shyǵýyn qamtamasyz etý kerek. Osyǵan baılanysty Ulttyq bank 2023 jyldan bastap memlekettik baǵdarlamalardy qarjylandyrýdy toqtata bastaıdy. 2021 jyly «Baspana hıt», al 2022 jyly «7-20-25» baǵdarlamasy aıaqtalady», dep málimdedi agenttik tóraǵasy Almatyda ótken Cfo Idea exchange & networking sammıtinde.
«7-20-25» áleýmettik baǵdarlamasy zaım berýdi 2018 jyly 4 shildede bastaǵan. Nesıe tek ulttyq valıýtamen beriledi. «Qazaqstannyń ornyqtylyq qory»AQ PR-menedjeri Aıbar Oljaevtyń aıtýynsha, baǵdarlamaǵa eldiń barsha azamaty qatysa alady.
– Búgingi tańda osy baǵdarlama boıynsha 325 mlrd teńgege nesıe berildi. Bul óz kezeginde bastapqy turǵyn úı naryǵynan 27 myń qazaqstandyq otbasynyń úıli bolýyna septigin tıgizdi. Baǵdarlamaǵa Qazaqstannyń barlyq azamattary qatysa alady. Bastysy azamattyń atynda úı jáne basqa ıpotekasy bolmaýy tıis. Sonymen birge tabys resmı rastalýy qajet. Eger siz aılyq alatyn bolsańyz, onda ol boıynsha zeınataqy qoryna salymdar túsip turýy kerek. Al jeke kásipker bolsańyz, onda bank sizden jyldyq salyq deklarasııasyn talap etedi, – deıdi qor ókili.
Baǵdarlamanyń merzimi shekteýsiz bolyp bekitilgen. Joba bekitilgen 1 trln teńge lımıtine jetkenge deıin júzege asyryla beredi.