Baltyq jaǵalaýynda ótip jatqan shaıbaly hokkeıden álem chempıonatynyń toptyq kezeńdegi básekeleri aıaqtalyp, jahandyq dodanyń pleı-off kezeńine joldama alǵan quramalar belgili boldy. V tobynda synǵa túsken Qazaqstan quramasy sońǵy týrda Norvegııa hokkeıshilerimen kezdesip, qarsylastaryna jol berdi.
Álem chempıonatynyń toptyq kezeńdegi sońǵy týrynda Qazaqstan men Norvegııa hokkeıshileriniń joly túıisip, kezdesý qarsylastyń jeńisimen aıaqtaldy. Birinshi kezeńde komandalar uzaq ýaqyt bir-biriniń qaqpasynan sańylaý taba almaı, biraz ábigerge tústi. Degenmen 10-mınýttan bastap qarsylastaryn qyspaqqa alǵan Qazaqstan quramasy birinshi kezeńniń aıaqtalýyna 4 mınýt qalǵanda gol soǵa aldy. Qorǵaýshy Vıktor Svedbergten tamasha pas alǵan shabýylshy Dmıtrıı Shevchenko qaqpashymen betpe-bet shyǵyp, álem chempıonatyndaǵy alǵashqy shaıbasyn soqty.
Ekinshi kezeńde Norvegııa hokkeıshileri basymdyqty óz qoldaryna alyp, 28-mınýtta tarazy basyn teńestirip ketti. Tomas Valkve Olsen Matıas Trettenstiń shyǵarǵan pasynan keıin Qazaqstan qaqpasyna shaıbany dál baǵyttady – 1:1. Úshinshi kezeńdi de belsendi bastaǵan qarsylastar oıyn bastala salysymen qaqpamyzǵa ekinshi shaıbasyn soqty. Gol avtory – Stefan Espeland. Bizdiń komandada esepti teńestirý bylaı tursyn, esepte alǵa shyǵatyn birneshe múmkindik bolǵanymen, hokkeıshilerimiz urymtal sátti tıimdi paıdalana almady. Norvegııalyqtar «sen soqpasań, saǵan soǵady» degen qaǵıdany berik ustanyp, kezdesýdiń aıaqtalýyna bir mınýt qalǵanda úshinshi golyn soǵyp, kezdesýdiń núktesin qoıdy. Qorytyndy esep – 3:1, Norvegııa hokkeıshileriniń paıdasyna.