Qazaqstan Prezıdenti Qasym-Jomart Toqaev О́zbekstannyń Premer-Mınıstri Abdýlla Arıpovty qabyldady, dep habarlaıdy Egemen.kz Aqordaǵa silteme jasap.
Qasym-Jomart Toqaev zamanaýı syn-qaterler kezinde turaqtylyqtyń joǵary deńgeıin kórsetken ekijaqty yntymaqtastyqtyń qazirgi ahýalyna oń baǵasyn berdi. Prezıdenttiń pikirinshe, buǵan joǵary deńgeıdegi belsendi dıalog, úkimetter arasyndaǵy tyǵyz yqpaldastyq, sondaı-aq, taraptardyń eki el ortasyndaǵy kópqyrly baılanystardy nyǵaıtýǵa umtylysy dálel bola alady.
– Eki memleket arasyndaǵy yntymaqtastyq meniń О́zbekstanǵa jasaǵan saparym kezinde qurmetti áriptesim Shavkat Mıromonuly Mırzııoevpen kelissózder barysynda qol jetkizilgen ýaǵdalastyqtarǵa sáıkes joǵary deńgeıde ári tabysty damyp keledi. Biz baýyrlas О́zbekstanmen yqpaldastyqty damytýǵa basa mán beremiz. О́ıtkeni muny Ortalyq Azııadaǵy turaqtylyq pen qaýipsizdikti saqtaýdyń mańyzdy faktor dep sanaımyz. Eki el arasyndaǵy yntymaqtastyqty ártúrli baǵytta, eń bastysy, mazmundyq turǵydan ilgeriletetin birlesken birqatar jobalardyń bar ekenin atap ótkim keledi, – dedi Qazaqstan Prezıdenti.
Memleket basshysy búginde О́zbekstannyń kóptegen salalar boıynsha tabysty damyp, onda josparly túrde úlken reformalardyń júrgizilip jatqanyn málim etti. Prezıdenttiń sózinshe, qazaqstandyqtar strategııalyq áriptesimiz ári odaqtasymyz О́zbekstannyń jetistikterine shyn nıetimen qýanady.
– О́zbekstan Shavkat Mıromonuly Mırzııoevtiń basshylyǵymen áleýmettik-ekonomıkalyq damý boıynsha aıtarlyqtaı jetistikterge qol jetkizdi. Baýyrlas el bolǵandyqtan biz buǵan qýanyshtymyz. Árıne О́zbekstannyń tabysty damýy ózara tıimdi yntymaqtastyqty órkendetýge oń yqpal etedi, – dedi Qasym-Jomart Toqaev.
Abdýlla Arıpov óz kezeginde kezdesýge múmkindik týǵyzǵany úshin Qasym-Jomart Toqaevqa alǵys aıtyp, О́zbekstan Prezıdenti Shavkat Mırzııoevtiń júrekjardy sálemi men izgi nıetin jetkizdi.
– Shavkat Mıromonuly men Sizdiń, Qasym-Jomart Kemeluly turaqty ári ózara senimge negizdelgen qarym-qatynastaryńyzdyń arqasynda kópjaqty qazaq-ózbek yntymaqtastyǵynyń oń qarqyny sátti qalyptasty. Aldaǵy jyldary ózara saýda-sattyq kólemin 10 mıllıard dollarǵa jetkizý mindetin júktedińizder. Eki el úkimetteri osy mejege naqty qol jetkizýdi kózdeıdi, – dedi Abdýlla Arıpov.
Memleket basshysy úkimetterdiń jumys qarqynyn báseńdetýge bolmaıtynyn atap ótip, koronavırýs kezeńinen keıingi eki el arasyndaǵy saýda-ekonomıkalyq yqpaldastyqty arttyrý úshin barlyq áleýetti jumyldyrýdyń mańyzdy ekenine nazar aýdardy.
Qasym-Jomart Toqaev Shavkat Mırzııoevpen telefon arqyly sóılesý barysynda О́zbekstan Prezıdentiniń ózine yńǵaıly ýaqytta Qazaqstanǵa memlekettik saparyn uıymdastyrý jóninde ýaǵdalasqanyn aıtty.
Kezdesý sońynda Qazaqstan Prezıdenti О́zbekstannyń Premer-Mınıstri Abdýlla Arıpovti qazaq-ózbek baılanystaryn damytýǵa jáne dostyq arqaýyn nyǵaıtýǵa qosqan úlesi úshin II dárejeli Dostyq ordenimen marapattady.