Qazaqstan Respýblıkasynyń Premer-Mınıstri Asqar Mamın Nıderlandynyń jetekshi agroónerkásiptik kompanııalarynyń – jylyjaılar, aýyl sharýashylyǵy jabdyqtary, tuqymdar, ósimdikterdi bıologııalyq qorǵaý salasyndaǵy álemdik kóshbasshy kompanııalardyń basshylyǵymen kelissóz ótkizdi, dep habarlaıdy Egemen.kz.
Qazaqstanǵa kelgen nıderlandyq bıznes delegasııasynyń quramyna KUBO, Dutch Greenhouse Delta, Van der Hoeven Horticultural Projects, Certhon, Gakon, Koppert Biological Systems, Food Ventures, Hoogendoorn, Svensson, Priva, HVA International, Dalsem, Rijk Zwaan jáne t. b. ókilderi kirdi.
Taraptar AО́K salasyndaǵy yntymaqtastyqty damytý keleshegin, onyń ishinde Qazaqstannyń jylyjaı keshenderin, tuqym sharýashylyǵyn jáne aýyl sharýashylyǵynyń basqa da sektorlaryn damytýda jıyntyqty esepteýler, jasandy zerde jáne basqa da ınnovasııalyq tehnologııalardy engizý perspektıvalaryn talqylady.
Kelissóz qorytyndysy boıynsha «Kazakh Invest» UK» AQ, «Ulttyq agrarlyq ǵylymı-bilim berý ortalyǵy» KEAQ, Qazaqstannyń kartop jáne kókónis ósirýshiler odaǵy, «Qazyna Kapıtal Menedjment» AQ ókilderi, sondaı-aq birqatar qazaqstandyq kompanııalar Dutch Greenhouse Delta, Food Ventures, Rijk Zwaan, Solynta jáne Koppert Biological Systems-ben Qazaqstanda jemis-kókónis sharýashylyǵy men tuqymdyq kartop óndirisin, ósimdikterdi bıologııalyq qorǵaý quraldaryn damytý, QR jylyjaı keshenderin salý, Túrkistan oblysynda demonstrasııalyq stansııa men joǵary tehnologııalyq-zertteý ortalyǵyn salý boıynsha birlesken jobalardy iske asyrýdy kózdeıtin kelisimderge qol qoıdy.
Atalǵan jobalar boıynsha QR ekonomıkasyna salynǵan ınvestısııalardyń jalpy somasy 100 mlrd teńgeden asady. Olardy iske asyrý Qazaqstanda jańa sapaly jumys oryndaryn qurýǵa, AО́K salasynda ozyq tehnologııalar men praktıkany engizýge, sondaı-aq Qazaqstannyń azyq-túlik qaýipsizdigin qamtamasyz etý deńgeıin jáne eksporttyq áleýetin arttyrýǵa jol ashady.
Nıderlandtyq kompanııalardyń ókilderi QR-ǵa sapary aıasynda Almaty, Aqtóbe, Batys Qazaqstan oblystary men Almaty qalasyna óńirlerdiń basshylyǵymen jáne qazaqstandyq seriktesterimen birlesken jobalardy iske asyrýdy egjeı-tegjeıli talqylaý úshin barady.
Qazaqstanda nıderlandtyq kapıtaldyń qatysýymen 900-den astam kásiporyn jumys isteıdi, olar QR ekonomıkasynyń energetıka, mashına jasaý, qurylys, kólik-logıstıka jáne agroónerkásip sektorlarynda keńinen usynylǵan.
Ozyq tehnologııalar men agrosektordy júrgizýdiń tıimdi ádisterin paıdalanatyn Nıderlandy kóshbasshy orynǵa ıe jáne álem boıynsha AQSh-tan keıin aýyl sharýashylyǵy ónimderiniń ekinshi iri eksporttaýshysy.
Kelissózderge Qazaqstan tarapynan aýyl sharýashylyǵy mınıstri Saparhan Omarov, Nıderland Koroldigindegi QR Tótenshe jáne О́kiletti elshisi Asqar Jumaǵalıev, «Kazakh Invest» UK» AQ basqarma tóraǵasy Meıirjan Iýsýpov, «Ulttyq agrarlyq ǵylymı-bilim berý ortalyǵy» KEAQ basqarma tóraǵasy Gúlmıra Isaeva, «Báıterek» UBH» AQ basqarma tóraǵasynyń birinshi orynbasary Qanysh Izbastın, Nıderlandy tarapynan QR-daǵy elshi Andre Karstens qatysty.