Memleket basshysyna bıylǵy qańtar-mamyr aılaryndaǵy aqsha-nesıe saıasatyn júzege asyrýdyń aldyn ala qorytyndylary jáne álemdegi iskerlik belsendiliktiń qalpyna kelýi jóninde, ınflıasııanyń ósýi men ınflıasııalyq boljamdar aıasynda ortalyq bankterdiń beıtarap aqsha-nesıe saıasatyna kóshýi týraly baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Prezıdentke el ekonomıkasy ósiminiń oń baǵyt alýy jáne onyń bıylǵy damý perspektıvalary, sondaı-aq memlekettik baǵaly qaǵazdar naryǵynda jekelegen ınvestorlar men rezıdent emes adamdardyń iskerlik belsendiliginiń qaıta qalpyna kelýi jaıynda aqparat berildi.
Qasym-Jomart Toqaevqa altyn baǵasynyń ósýine, syrtqy naryqtardaǵy qolaıly jaǵdaıdyń nátıjesinde ınvestısııalyq kiris pen Ulttyq qorǵa túsken qarjynyń artýyna baılanysty 2016 jylǵy qyrkúıekten beri alǵash ret Qazaqstannyń jalpy halyqaralyq rezervteriniń kólemi 95 mıllıard AQSh dollaryna deıin jetkeni aıtyldy.
Erbolat Dosaev Memleket basshysyna bıylǵy mamyrda ınflıasııanyń 7,2 paıyzǵa deıin údeý sebepteri jáne Ulttyq banktiń bıylǵa arnalǵan negizgi makroekonomıkalyq kórsetkishter boıynsha jańartylǵan boljamdary týraly jetkizdi. Sonymen qatar bank júıesindegi teńgelik salymdardyń ósý úrdisi jáne Ulttyq bank esebinen qarjylandyrylatyn daǵdarysqa qarsy Prezıdent bastamalarynyń oryndalý barysy týraly málimet berildi.
Kezdesý qorytyndysy boıynsha Qasym-Jomart Toqaev birqatar naqty tapsyrma berdi.