Eskertilmeıdi emes, «ýyldyryq shashý kezinde balyq aýlaýǵa bolmaıdy» dep aıtylyp-aq jatyr. Ashkózdik pe, dál osy ýaqytta Shyǵys Qazaqstanda qaskóıler 2 tonnadan astam balyq aýlaǵan. Eseptep kórsek, 3 mln teńgeniń balyǵy.
Ýyldyryq shashý kezinde tyıym salynǵan balyq ósirý oryndarynda jáne erekshe qorǵalatyn tabıǵı aýmaqtarda balyqty zańsyz aýlaýǵa jol bermeý úshin 16 sáýir men 30 mamyr aralyǵynda «Ýyldyryq-2021» jedel aldyn alý is-sharasy ótken. Oǵan jumyldyrylǵan polıseıler ekologııalyq qylmystardy, onyń ishinde buryn jasalǵan qylmystardy ashý maqsatynda jumys istedi. Olar qylmystyń aldyn alyp qana qoımaı, ózen-kólderdegi balyq qoryn saqtap qalýǵa eleýli úles qosty. Áıtpese, sý jaǵalap júrgen brakonerler az emes edi.
– Tabıǵat qorǵaý polısııasynyń bólimsheleri balyq resýrstaryn qorǵaý maqsatynda kún saıyn reıdtik is-sharalar ótkizip, nátıjesinde 316 quqyq buzýshylyqty anyqtady. Jedel aldyn alý is-sharasy barysynda brakonerler 2 tonnadan astam balyq aýlap, memleketke keltirilgen zalal 3 mln teńgeden asty. 300-ge jýyq tártip buzýshy ákimshilik jaýapkershilikke tartyldy, – dedi oblystyq polısııa departamentiniń bastyǵy Saǵat Madıev.
Reıd kezinde ózen-kólderdiń jaǵalaýynan 56 qylmys quraly (sıntetıkalyq torlar, balyq ustaýǵa arnalǵan shanyshqy, súzgishter, t.b.) tárkilenip, 3760 metr aý tabyldy. Atalǵan faktiler boıynsha Ákimshilik quqyq buzýshylyq týraly kodekstiń 383-babynyń 3-bóligi (balyq aýlaý jáne balyq resýrstary men basqa da sý janýarlaryn qorǵaý erejelerin buzý) boıynsha 9 materıal sotqa joldandy. Qylmystyq kodekstiń jabaıy janýarlar men ósimdikterdiń túrlerin, olardyń bólikterin nemese derıvattaryn zańsyz satyp alý, ótkizý, tasymaldaý, ákelý, áketý, saqtaý jónindegi 6-baby jáne 335-baby (balyq resýrstaryn, basqa da sý janýarlary men ósimdikterin zańsyz óndirý) boıynsha 7 zań buzýshylyq faktileri anyqtaldy.
Brakonerlik oqıǵalarynyń biri osy jyldyń 19 mamyrynda Buqtyrma sý qoımasynyń jaǵasynda boldy. Tabıǵatty qorǵaý polısııasy bóliminiń qyzmetkerleri Altaı aýdany Oktıabr kentiniń 1992 jáne 1977 jylǵy eki turǵynyn ustady. Tekserý kezinde ustalǵandardyń birine tıesili «Mitsubishi» avtokóliginde motory bar alıýmınıı qaıyq jáne 179 kılo rıpýs balyǵy tabyldy. Aqshaǵa shaqqanda, memleketke 874 750 teńgeniń shyǵyny keltirilgen. Atalǵan fakt boıynsha Qylmystyq kodekstiń 335-baby 1-bóligi boıynsha sotqa deıingi tergeý bastaldy.
Quqyq qorǵaý organdarynyń málimetinshe, tárkilengen balyq arnaıy qabyldaý ornyna tapsyrylady. Al satýdan túsken tabys memleket qazynasyna aýdarylady.
Shyǵys Qazaqstan oblysy