Azattyqtyń qusy aspanymyzda qalyqtaǵanyna 30 jyl. Táýbe, táı-táı basqan táýelsizdik orda buzar jasqa kelip erkindiktiń samalyn erkin qushyp júrmiz. Árbir otandastyń júreginde bostandyq urany bulqynyp jatyr. Bul memleketimizdiń uly ótkelderdi eńserip, árbir salada óziniń qoltańbasyn qaldyrǵanyn aıǵaqtaıtyndaı. Oǵan «Táýelsizdik kókjıegi» atty kórme taǵy bir dálel.
Qazaqstannyń beıneleý ónerin álemge nasıhattap júrgen elimizdiń ár aımaǵyndaǵy tanymal sýretshilerdiń shyǵarmashylyǵyn dáripteýdi kózdegen taǵylymdy shara onlaın jáne oflaın formatta ótti. Halyqaralyq kórmeler men sımpozıýmdarda elimizdiń atyn asqaqtatyp, beıneler óneri salasynda bıikterdi baǵyndyryp júrgen 30 qylqalam sheberiniń eńbegi oqyrmandy eleń etkizdi. Saltanatty sharanyń biz de kýási boldyq.
Nur-Sultan qalasy Sýretshiler odaǵynyń tóraǵasy О́miráli Ismaılov kórmeniń ashylý saltanatynda sýretshilerdiń qylqalamynan shyqqan nebir ǵajap týyndylardy tamashalaýǵa shaqyrdy.
«Búgin Qazaqstan Respýblıkasynyń Memlekettik rámizderi kúnimen tuspa-tus kelgen «Táýelsizdik kókjıegi» atty kórmeniń ashylýy ótýde. Bul – sýretshiler úshin aıtýly kún. Qazaqstan Respýblıkasy Táýelsizdiginiń 30 jyldyǵyna oraılastyrǵan bul kórmede sizder boıaý bolmysyn uǵýǵa umtylǵan qylqalam sheberleriniń týyndylaryn tamashalaıtyn bolasyzdar. Elimizde osyndaı kórmeler kóp bola bersin», dedi О́.Ismaılov.
Kórmege Mádenıet salasynyń úzdikteri, Sýretshiler odaǵynyń músheleri, «Mádenıet salasynyń úzdigi» tósbelgisiniń ıegerleri, halyqaralyq kıprlyq «Kúmis kilt» sımpozıýmynyń jáne basqa da kóptegen marapattyń ıegerleri, sonymen qatar sheteldik, búkilodaqtyq, respýblıkalyq jáne oblystyq kórmelerdiń sýretshileri qatysty. Qosymsha oflaın formatta ótkenine qaramastan, qylqalamnan qýat alǵan shyǵarmashyl tulǵalardyń deni keldi. Olardyń osyndaı ıgi sharany saǵynǵandyǵy kózderinen kórinip tur.
Atalǵan kórmede sýretshilerdiń keskindeme, grafıka jáne músin janryndaǵy ártúrli tehnıkamen oryndalǵan 60-tan astam týyndylary ekspozısııalanyp, qylqalam sheberleri óz shyǵarmashylyǵynda Qazaqstannyń tarıhyn, mádenıeti men tabıǵatyn tanystyrdy.
Talantty sýretshilerdiń jumystary kópshilik kóńilinen shyǵyp, kórmege kelýshiler rýhanı jáne estetıkalyq jaǵynan marqaıyp, týyndylardy joǵary baǵalady.
Eń qyzyǵy, kórme aıasynda «Táýelsiz Qazaqstan qoǵamyndaǵy sýretshiniń róli» taqyrybynda dóńgelek ústel ótti.
Shara barysynda Qazaqstannyń zamanaýı beıneleý óneriniń ózekti máseleleri talqylanyp, sheberhanalardyń jumysy sóz boldy. Sonymen qatar búginde sýretshiler ómirinde ózekti bolyp otyrǵan qylqalam sheberleriniń mártebesin anyqtaý máselesi de kóterildi.
Shara barysynda aımaqtan kelgen sýretshiler ózara pikir almasyp, osyndaı kezdesý uıymdastyrýǵa muryndyq bolǵan mýzeı ujymyna alǵystaryn bildirdi.
Eske sala keteıik, «Táýelsizdik kókjıegi» atty sulýlyq pen ásemdikke toly kórmeni ónersúıer qaýym 28 maýsymǵa deıin tamashalaı alady.